ek sach hai jise KHwabon ne bacha rakkha hai

ek sach hai jise ḳhvāboñ ne bachā rakkhā hai

is mohabbat ko kitāboñ ne bachā rakkhā hai

ek bachche ke savāloñ se banī hai duniyā

jis ko ik maañ ke javāboñ ne bachā rakkhā hai

koī achchhā na rahe to na rahegā kuchh bhī

thoḌe achchhoñ ko ḳharāboñ ne bachā rakkhā hai

dil kī dhaḌkan se to dushvār huā thā jiinā

mujh ko duniyā ke hisāboñ ne bachā rakkhā hai

muddateñ ho ga.iiñ dekhā ye kisī ne bhī nahīñ

kaun sā chehra naqāboñ ne bachā rakkhā hai

ye samundar ye talātum aur akelī kashtī

jis ko hastī ke ḳhitāboñ ne bachā rakkhā hai

soch kal ke liye itnā bhī sañjo pā.egā

jo gunāhoñ se savāboñ ne bachā rakkhā hai

achchhe achchhoñ se na īmāñ kī ye daulat sañbhlī

is ko ham jaise ḳharāboñ ne bachā rakkhā hai

ab guzar jaa.eñ isī shahr ke sahrā meñ din

jis meñ sāyoñ ne sarāboñ ne bachā rakkhā hai

tere dāman meñ haiñ motī ye anūThe jin ko

zindagī tere 'azāboñ ne bachā rakkhā hai

ek sach hai jise KHwabon ne bacha rakkha hai

is mohabbat ko kitabon ne bacha rakkha hai

ek bachche ke sawalon se bani hai duniya

jis ko ek man ke jawabon ne bacha rakkha hai

koi achchha na rahe to na rahega kuchh bhi

thoDe achchhon ko KHarabon ne bacha rakkha hai

dil ki dhaDkan se to dushwar hua tha jina

mujh ko duniya ke hisabon ne bacha rakkha hai

muddaten ho gain dekha ye kisi ne bhi nahin

kaun sa chehra naqabon ne bacha rakkha hai

ye samundar ye talatum aur akeli kashti

jis ko hasti ke KHitabon ne bacha rakkha hai

soch kal ke liye itna bhi sanjo paega

jo gunahon se sawabon ne bacha rakkha hai

achchhe achchhon se na iman ki ye daulat sanbhli

is ko hum jaise KHarabon ne bacha rakkha hai

ab guzar jaen isi shahr ke sahra mein din

jis mein sayon ne sarabon ne bacha rakkha hai

tere daman mein hain moti ye anuThe jin ko

zindagi tere 'azabon ne bacha rakkha hai