ek tabir ka sam rakh ke chala jata hai

ek ta.abīr kā sam rakh ke chalā jaatā hai

ḳhvāb āñkhoñ meñ alam rakh ke chalā jaatā hai

jo bhī aatā hai mire dil meñ Thahar kar kuchh din

haath par hijr kā ġham rakh ke chalā jaatā hai

mujh ko jaldī to nahīñ hai pa mirā kūza-gar

chaak par ḳhaak ko nam rakh ke chalā jaatā hai

koī chupke se banātā hai ḳhad-o-ḳhāl tire

mujh ko tasvīr meñ zam rakh ke chalā jaatā hai

jab vo aatā hai mukammal hī use miltā huuñ

jab vo jaatā hai to kam rakh ke chalā jaatā hai

tujh ko ma.alūm kahāñ mujh pe guzartī hai kyā

tū to bas dil pe qadam rakh ke chalā jaatā hai

raat ḳhairāt meñ detī hai nayā din 'rāshid'

chāñd sūraj kā bharam rakh ke chalā jaatā hai

ek tabir ka sam rakh ke chala jata hai

KHwab aankhon mein alam rakh ke chala jata hai

jo bhi aata hai mere dil mein Thahar kar kuchh din

hath par hijr ka gham rakh ke chala jata hai

mujh ko jaldi to nahin hai pa mera kuza-gar

chaak par KHak ko nam rakh ke chala jata hai

koi chupke se banata hai KHad-o-KHal tere

mujh ko taswir mein zam rakh ke chala jata hai

jab wo aata hai mukammal hi use milta hun

jab wo jata hai to kam rakh ke chala jata hai

tujh ko malum kahan mujh pe guzarti hai kya

tu to bas dil pe qadam rakh ke chala jata hai

raat KHairaat mein deti hai naya din 'rashid'

chand suraj ka bharam rakh ke chala jata hai