ek taswir mein pinhan kai taswiren hain

ek tasvīr meñ pinhāñ ka.ī tasvīreñ haiñ

ḳhvāb to ek hai aur saikḌoñ ta.abīreñ haiñ

lab pe shīrīñ suḳhanī myaan meñ shamshīreñ haiñ

yaar kī sulh meñ bhī jang kī tadbīreñ haiñ

ishq kī bandagiyāñ rakhtī haiñ andāz na.e

in namāzoñ meñ azāneñ haiñ na takbīreñ haiñ

vasl se hai koī mahrūm koī diid se bhī

miltī jaltī huī ushshāq kī taqdīreñ haiñ

ham hue tum hue saaqī huā paimāna huā

shab kī mahfil meñ inhīñ chāroñ kī tanvīreñ haiñ

halqa-e-dām-e-alā.eq ho ki fikr-e-nāmūs

pā-e-āzādī-e-insāñ kī ye zanjīreñ haiñ

muḳhtalif jazboñ ke haiñ ā.ina-e-dil pe nuqūsh

ik muraqqā hai ki har rang kī tasvīreñ haiñ

rang phūloñ kā ziyā chāñd kī hūroñ kā jamāl

ye sab us mus.haf-e-ruḳhsār kī tafsīreñ haiñ

shā.erī kā mujhe da.avā nahīñ 'sāqib' phir bhī

mere ash.ār meñ jazbāt kī tasvīreñ haiñ

ek taswir mein pinhan kai taswiren hain

KHwab to ek hai aur saikDon tabiren hain

lab pe shirin suKHani myan mein shamshiren hain

yar ki sulh mein bhi jang ki tadbiren hain

ishq ki bandagiyan rakhti hain andaz nae

in namazon mein azanen hain na takbiren hain

wasl se hai koi mahrum koi did se bhi

milti jalti hui ushshaq ki taqdiren hain

hum hue tum hue saqi hua paimana hua

shab ki mahfil mein inhin chaaron ki tanwiren hain

halqa-e-dam-e-alaeq ho ki fikr-e-namus

pa-e-azadi-e-insan ki ye zanjiren hain

muKHtalif jazbon ke hain aaina-e-dil pe nuqush

ek muraqqa hai ki har rang ki taswiren hain

rang phulon ka ziya chand ki huron ka jamal

ye sab us mushaf-e-ruKHsar ki tafsiren hain

shaeri ka mujhe dawa nahin 'saqib' phir bhi

mere ashaar mein jazbaat ki taswiren hain