ek titli ke par marne se hawaon ki lahron mein tufan paida hua

ek titlī ke par mārne se havāoñ kī lahroñ meñ tūfān paidā huā

kaise chhoTe vuqūe se kitne baḌe ik vuqūe kā imkān paidā huā

shar-pasandī kā sho.ala diloñ tak jo pahuñchā to jal kar shabīheñ fanā ho ga.iiñ

nazr-e-ātish huiiñ ā.inoñ kī dukāneñ to hairat kā bohrān paidā huā

avval avval ye kirdār mazkūr thā zindagī kī purānī asātīr meñ

āḳhir āḳhir zehānat kī paivand-kārī se masnūī insān paidā huā

tujh se bichhḌā to guzrā sharar kī tarah maiñ bhī pal bhar chamakne ke ehsās se

apnī maujūdgī kā ḳhayāl apne mādūm hone ke daurān paidā huā

dil meñ ġhaflat kī lahroñ ke Takrāo se terī yādoñ kī tarsīl ruk jā.egī

ye zamīñ Duub jā.egī tārīkiyoñ meñ agar shamsī tūfān paidā huā

ek hī ruuh fitrat ke asrār meñ kār-farmā hai ashyā se anfās tak

jis kī sūrat-garī ko kahīñ koī shā.ir kahīñ kīmiyā-dān paidā huā

ek titli ke par marne se hawaon ki lahron mein tufan paida hua

kaise chhoTe wuque se kitne baDe ek wuque ka imkan paida hua

shar-pasandi ka shoala dilon tak jo pahuncha to jal kar shabihen fana ho gain

nazr-e-atish huin aainon ki dukanen to hairat ka bohran paida hua

awwal awwal ye kirdar mazkur tha zindagi ki purani asatir mein

aaKHir aaKHir zehanat ki paiwand-kari se masnui insan paida hua

tujh se bichhDa to guzra sharar ki tarah main bhi pal bhar chamakne ke ehsas se

apni maujudgi ka KHayal apne madum hone ke dauran paida hua

dil mein ghaflat ki lahron ke Takrao se teri yaadon ki tarsil ruk jaegi

ye zamin Dub jaegi tarikiyon mein agar shamsi tufan paida hua

ek hi ruh fitrat ke asrar mein kar-farma hai ashya se anfas tak

jis ki surat-gari ko kahin koi shair kahin kimiya-dan paida hua