ek tum itna lazmi kyon ho

ek tum itnā lāzmī kyoñ ho

phir mayassar kabhī kabhī kyoñ ho

jis ko jaanā hai vo chalā jaa.e

kah ke phir mujh ko roktī kyoñ ho

ye mire hijr kī kahānī hai

tum ise sun ke ro rahī kyoñ ho

tum bhī ho kyā charāġh muflis kā

shaam hote hī bujh ga.ī kyoñ ho

jab na pahuñche tumhāre dil tak ye

shā'irī kyā ho shā'irī kyoñ ho

dī ga.ī hai hameñ sazā meñ phir

itnī āsān zindagī kyoñ ho

diip raushan haiñ us kī yādoñ ke

mere kamre meñ tīrgī kyoñ ho

saath tum ho to vaqt achchhā hai

ab mire haath meñ ghaḌī kyoñ ho

ek tum itna lazmi kyon ho

phir mayassar kabhi kabhi kyon ho

jis ko jaana hai wo chala jae

kah ke phir mujh ko rokti kyon ho

ye mere hijr ki kahani hai

tum ise sun ke ro rahi kyon ho

tum bhi ho kya charagh muflis ka

sham hote hi bujh gai kyon ho

jab na pahunche tumhaare dil tak ye

sha'iri kya ho sha'iri kyon ho

di gai hai hamein saza mein phir

itni aasan zindagi kyon ho

dip raushan hain us ki yaadon ke

mere kamre mein tirgi kyon ho

sath tum ho to waqt achchha hai

ab mere hath mein ghaDi kyon ho