ek umr lagti hai aashiyan banane mein

ek 'umr lagtī hai āshiyāñ banāne meñ

aur pal nahīñ lagtā bijliyāñ girāne meñ

pūchhte ho kyā mujh se kaun sī hai ye manzil

tīrgī sulagtī hai ik diyā jalāne meñ

kaun ḳhvāb dekhegā dūsrī rifāqat ke

zindagī batā dī hai tum ko bhuul jaane meñ

shab-gazīda shahzādī saj-sañvar ke aa.iye

jugnuoñ ke gahne haiñ raat ke ḳhazāne meñ

muntazir thī maiñ kab se ik tirī navāzish kī

der kyoñ lagāte ho aañkh ko uThāne meñ

aur sabhī gile shikve phir kabhī uThā rakhnā

vaqt biit jā.egā aap ko manāne meñ

ham-safar mire hamdam rāsta vahī manzil

is qadar takalluf kyoñ hāl-e-dil sunāne meñ

ek 'umr lagti hai aashiyan banane mein

aur pal nahin lagta bijliyan girane mein

puchhte ho kya mujh se kaun si hai ye manzil

tirgi sulagti hai ek diya jalane mein

kaun KHwab dekhega dusri rifaqat ke

zindagi bata di hai tum ko bhul jaane mein

shab-gazida shahzadi saj-sanwar ke aaiye

jugnuon ke gahne hain raat ke KHazane mein

muntazir thi main kab se ek teri nawazish ki

der kyon lagate ho aankh ko uThane mein

aur sabhi gile shikwe phir kabhi uTha rakhna

waqt bit jaega aap ko manane mein

ham-safar mere hamdam rasta wahi manzil

is qadar takalluf kyon haal-e-dil sunane mein