ek unche makan ki baaten hain

ek ūñche makāñ kī bāteñ haiñ

apnī bas āsmāñ kī bāteñ haiñ

kuchh tirī qurbatoñ se vābasta

kuchh to vaqt-e-nihāñ kī bāteñ haiñ

kal jo dard-e-nihāñ hamāre the

aaj saare jahāñ kī bāteñ haiñ

mai-kada mashġhala rahā merā

hosh-e-hastī kahāñ kī bāteñ haiñ

kaun kartā hai pyaar kī bāteñ

ab to tīr-o-kamāñ kī bāteñ haiñ

tū na samjhegā vā’iz-e-nādāñ

jo ye 'ishq-e-butāñ kī bāteñ haiñ

mere maazī kī guftugū saarī

aaj daur-e-ravāñ kī bāteñ haiñ

shādmānī surūr-o-jām-o-subū

terī tere jahāñ kī bāteñ haiñ

kuchh kahāñ hai 'ḳhayāl' poshīda

dil kī bāteñ zamāñ kī bāteñ haiñ

ek unche makan ki baaten hain

apni bas aasman ki baaten hain

kuchh teri qurbaton se wabasta

kuchh to waqt-e-nihan ki baaten hain

kal jo dard-e-nihan hamare the

aaj sare jahan ki baaten hain

mai-kada mashghala raha mera

hosh-e-hasti kahan ki baaten hain

kaun karta hai pyar ki baaten

ab to tir-o-kaman ki baaten hain

tu na samjhega wa’iz-e-nadan

jo ye 'ishq-e-butan ki baaten hain

mere mazi ki guftugu sari

aaj daur-e-rawan ki baaten hain

shadmani surur-o-jam-o-subu

teri tere jahan ki baaten hain

kuchh kahan hai 'KHayal' poshida

dil ki baaten zaman ki baaten hain