faeda us mein ho ya apna KHasara chahiye

fā.eda us meñ ho yā apnā ḳhasārā chāhiye

chāhiye to bas vahī parvardigārā chāhiye

us ne mujh se phuul māñgā to mujhe hairat huī

laḌkiyoñ ko maiñ samajhtā thā sitārā chāhiye

ḳhud-kushī kī raah par maiñ hī nahīñ maa.il yahāñ

peḌ bhī āvāz dete haiñ ki aarā chāhiye

baaġh kahte haiñ use laayā karo tum sair ko

phuul kahte haiñ hameñ us kā utārā chāhiye

maiñ badan aur ruuh meñ tafrīq kar saktā nahīñ

jo tumhāre paas hai saare kā saarā chāhiye

koī dariyā is ilāqe kī ḳhabar-gīrī ko aa.e

ret hotī sar-zamīnoñ ko sahārā chāhiye

ham nahīñ kuufī qabīle se jo dhokā deñ tumheñ

dil hamārā chāhiye yā sar hamārā chāhiye

faeda us mein ho ya apna KHasara chahiye

chahiye to bas wahi parwardigara chahiye

us ne mujh se phul manga to mujhe hairat hui

laDkiyon ko main samajhta tha sitara chahiye

KHud-kushi ki rah par main hi nahin mail yahan

peD bhi aawaz dete hain ki aara chahiye

bagh kahte hain use laya karo tum sair ko

phul kahte hain hamein us ka utara chahiye

main badan aur ruh mein tafriq kar sakta nahin

jo tumhaare pas hai sare ka sara chahiye

koi dariya is ilaqe ki KHabar-giri ko aae

ret hoti sar-zaminon ko sahaara chahiye

hum nahin kufi qabile se jo dhoka den tumhein

dil hamara chahiye ya sar hamara chahiye