faKHtaon ke bikhere hue par le jao

fāḳhtāoñ ke bikhere hue par le jaao

ye zarūrī hai yahī raḳht-e-safar le jaao

aur to kyā hī bachā aañkh ke vīrāne meñ

hai koī ḳhvāb sā ik rāt-badar le jaao

ai bhaTakne ke irāde se nikalne vaalo

ham se kuchh dasht-navardī kā hunar le jaao

ek kashtī baḌī itrā.e hai dariyā uupar

us ke gāloñ meñ jo paḌte haiñ bhañvar le jaao

baiThe baiThe maiñ kahīñ aur chalā jaatā huuñ

yaar tum apnī mohabbat kā asar le jaao

ham ne jhuk kar nahīñ aane kī qasam khaa.ī hai

pahle māthe se ulajhtā huā dar le jaao

hukm-e-sultān kī ta.amīl tumhāre liye hai

maiñ nahīñ jā rahā chāho to ye sar le jaao

faKHtaon ke bikhere hue par le jao

ye zaruri hai yahi raKHt-e-safar le jao

aur to kya hi bacha aankh ke virane mein

hai koi KHwab sa ek raat-badar le jao

ai bhaTakne ke irade se nikalne walo

hum se kuchh dasht-nawardi ka hunar le jao

ek kashti baDi itrae hai dariya upar

us ke galon mein jo paDte hain bhanwar le jao

baiThe baiThe main kahin aur chala jata hun

yar tum apni mohabbat ka asar le jao

hum ne jhuk kar nahin aane ki qasam khai hai

pahle mathe se ulajhta hua dar le jao

hukm-e-sultan ki tamil tumhaare liye hai

main nahin ja raha chaho to ye sar le jao