fasla jab mujhe ehsas-e-thakan baKHshega

fāsla jab mujhe ehsās-e-thakan baḳhshegā

paañv ko phuul bhī kāñToñ kī chubhan baḳhshegā

kitne sūraj isī jazbe se ugaa.e maiñ ne

koī sūraj to mere ghar ko kiran baḳhshegā

chāhtā huuñ ki kabhī mujh ko bhī bistar ho nasīb

jaane kis roz ḳhudā mujh ko badan baḳhshegā

log kahte haiñ ki sahrā ko gulistāñ kah do

us ke badle meñ vo chāñdī ke saman baḳhshegā

be-libāsī kā kareñ bhī to gilā kis se kareñ

zinda lāshoñ ko yahāñ kaun kafan baḳhshegā

sirf do-chār daraḳhtoñ pe qanā.at kaisī

vo sakhī hai to mujhe saarā chaman baḳhshegā

chhīn kar mujh se vo lamhoñ kī latāfat 'āzar'

zehn-e-āsūda ko sadiyoñ kī thakan baḳhshegā

fasla jab mujhe ehsas-e-thakan baKHshega

panw ko phul bhi kanTon ki chubhan baKHshega

kitne suraj isi jazbe se ugae main ne

koi suraj to mere ghar ko kiran baKHshega

chahta hun ki kabhi mujh ko bhi bistar ho nasib

jaane kis roz KHuda mujh ko badan baKHshega

log kahte hain ki sahra ko gulistan kah do

us ke badle mein wo chandi ke saman baKHshega

be-libasi ka karen bhi to gila kis se karen

zinda lashon ko yahan kaun kafan baKHshega

sirf do-chaar daraKHton pe qanaat kaisi

wo sakhi hai to mujhe sara chaman baKHshega

chhin kar mujh se wo lamhon ki latafat 'azar'

zehn-e-asuda ko sadiyon ki thakan baKHshega