fasle hain sadiyon ke aur zindagi tanha

fāsle haiñ sadiyoñ ke aur zindagī tanhā

dard-e-sar do-ālam kā ek aadmī tanhā

sho.ala-e-havādis ne hausla diyā varna

bujh ke rah ga.ī hotī sham-e-zindagī tanhā

zindagī meñ āmezish un kī rañg bhartī hai

dostī hī kaam aa.e aur na dushmanī tanhā

pūchhtā hai kab koī haal in charāġhoñ kā

raushnī dikhāte haiñ jo galī galī tanhā

thī nafas nafas ḳhushbū thā nazar nazar chehra

din guzar gayā tanhā raat kaT ga.ī tanhā

terī pārsā.ī kā rah gayā bharam vaa.iz

jurm hai magar nādāñ shaġhl-e-mai-kashī tanhā

guzre aise lamhe bhī mujh pe bārhā 'at.har'

maiñ ne ḳhud ko paayā hai anjuman meñ bhī tanhā

fasle hain sadiyon ke aur zindagi tanha

dard-e-sar do-alam ka ek aadmi tanha

shoala-e-hawadis ne hausla diya warna

bujh ke rah gai hoti sham-e-zindagi tanha

zindagi mein aamezish un ki rang bharti hai

dosti hi kaam aae aur na dushmani tanha

puchhta hai kab koi haal in charaghon ka

raushni dikhate hain jo gali gali tanha

thi nafas nafas KHushbu tha nazar nazar chehra

din guzar gaya tanha raat kaT gai tanha

teri parsai ka rah gaya bharam waiz

jurm hai magar nadan shaghl-e-mai-kashi tanha

guzre aise lamhe bhi mujh pe barha 'athar'

main ne KHud ko paya hai anjuman mein bhi tanha