faisla jab bhi mere yar kiya jaega

faisla jab bhī mire yaar kiyā jā.egā

saarī bastī ko ḳhabar-dār kiyā jā.egā

naam lete hue ā.eñge divāne merā

dasht-e-vahshat ko agar paar kiyā jā.egā

ham se andhoñ ko tirī shakl dikhā.ī degī

aam aise tirā dīdār kiyā jā.egā

pahle sab ḳhvāb zamīñ-burd kiye jā.eñge

phir mujhe niiñd se bedār kiyā jā.egā

bas isī aas pe baiThe haiñ tirī chaukhaT par

vaqt aa.egā to iz.hār kiyā jā.egā

lauT ā.eñgī bahāreñ mire vīrāne meñ

ḳhushk peḌoñ ko samar-bār kiyā jā.egā

tere aalam kī sabhī nazm badal saktī hai

ham faqīroñ ko agar ḳhvār kiyā jā.egā

ātish-e-hijr meñ ho jā.eñge jab surḳh badan

tab kahīñ aag ko gulzār kiyā jā.egā

faisla jab bhi mere yar kiya jaega

sari basti ko KHabar-dar kiya jaega

nam lete hue aaenge diwane mera

dasht-e-wahshat ko agar par kiya jaega

hum se andhon ko teri shakl dikhai degi

aam aise tera didar kiya jaega

pahle sab KHwab zamin-burd kiye jaenge

phir mujhe nind se bedar kiya jaega

bas isi aas pe baiThe hain teri chaukhaT par

waqt aaega to izhaar kiya jaega

lauT aaengi bahaaren mere virane mein

KHushk peDon ko samar-bar kiya jaega

tere aalam ki sabhi nazm badal sakti hai

hum faqiron ko agar KHwar kiya jaega

aatish-e-hijr mein ho jaenge jab surKH badan

tab kahin aag ko gulzar kiya jaega