faisla ye ho na paya roz ki baaton ke baad

faisla ye ho na paayā roz kī bātoñ ke baad

ḳhuun ke dhabbe dhuleñge kitnī barsātoñ ke baad

be-yaqīnī ḳhauf donoñ meñ rahegā kab talak

mil sakeñge khul ke ham kitnī mulāqātoñ ke baad

aap ne jo kuchh kahā jitnā kahā sab mustanad

baat koī kyā karegā aap kī bātoñ ke baad

ek ik mohara sañbhal kar rakh bisāt-e-adl par

aaj baazī haath aa.ī hai ka.ī mātoñ ke baad

apne hisse ke charāġhoñ kī lavoñ ko dekh kar

sub.h kī ummīd jaagī hai ka.ī rātoñ ke baad

baad mere ḳhuun kāġhaz par na Tapkegā kabhī

haath koī shal nahīñ hogā mire hāthoñ ke baad

ḳhud ko phir 'mushtāq' sannāTā banānā Thiik hai

baat jab bantī nazar aa.e nahīñ bātoñ ke baad

faisla ye ho na paya roz ki baaton ke baad

KHun ke dhabbe dhulenge kitni barsaton ke baad

be-yaqini KHauf donon mein rahega kab talak

mil sakenge khul ke hum kitni mulaqaton ke baad

aap ne jo kuchh kaha jitna kaha sab mustanad

baat koi kya karega aap ki baaton ke baad

ek ek mohara sanbhal kar rakh bisat-e-adl par

aaj bazi hath aai hai kai maton ke baad

apne hisse ke charaghon ki lawon ko dekh kar

subh ki ummid jagi hai kai raaton ke baad

baad mere KHun kaghaz par na Tapkega kabhi

hath koi shal nahin hoga mere hathon ke baad

KHud ko phir 'mushtaq' sannaTa banana Thik hai

baat jab banti nazar aae nahin baaton ke baad