faiz-e-taKHil se pahuncha main gulistan ke qarib

faiz-e-taḳh.īl se pahuñchā maiñ gulistāñ ke qarīb

aa chalā qāfila dil kā dar-e-zindāñ ke qarīb

jazb-e-dil le hī gayā husn-e-gurezāñ ke qarīb

kaisā aalam hai mire dīda-e-hairāñ ke qarīb

duur hangāma-e-tahzīb se tal.at-ba-kanār

jalva-e-mehr kī tanvīr bayābāñ ke qarīb

dil meñ ik hasrat-e-ḳhāmosh kā tūfān uThā

fāsle baḌhte ga.e manzil-e-jānāñ ke qarīb

kaun jaane kahāñ le jā.egī vahshat merī

ek sahrā bhī to hai shahr-e-nigārāñ ke qarīb

maiñ ne ashjār ke kunjoñ meñ pukārā tum ko

aa ke tum lauT ga.e parda-e-mizhgāñ ke qarīb

har ghaḌī shauq ko hai chashm-e-fusūñ-sāz kī yaad

be-ḳhudī le ga.ī sahrā meñ ġhazālāñ ke qarīb

sāhil-e-amn meñ āġhosh-e-mohabbat be-kaif

kaash kashtī mirī pahuñche kabhī tūfāñ ke qarīb

faiz-e-taKHil se pahuncha main gulistan ke qarib

aa chala qafila dil ka dar-e-zindan ke qarib

jazb-e-dil le hi gaya husn-e-gurezan ke qarib

kaisa aalam hai mere dida-e-hairan ke qarib

dur hangama-e-tahzib se talat-ba-kanar

jalwa-e-mehr ki tanwir bayaban ke qarib

dil mein ek hasrat-e-KHamosh ka tufan uTha

fasle baDhte gae manzil-e-jaanan ke qarib

kaun jaane kahan le jaegi wahshat meri

ek sahra bhi to hai shahr-e-nigaran ke qarib

main ne ashjar ke kunjon mein pukara tum ko

aa ke tum lauT gae parda-e-mizhgan ke qarib

har ghaDi shauq ko hai chashm-e-fusun-saz ki yaad

be-KHudi le gai sahra mein ghazalan ke qarib

sahil-e-amn mein aaghosh-e-mohabbat be-kaif

kash kashti meri pahunche kabhi tufan ke qarib