faiz-mamur fazaon se lipaT kar ro len

faiz-māmūr fazāoñ se lipaT kar ro leñ

phir madīne kī havāoñ se lipaT kar ro leñ

vaqt-e-ruḳhsat dil-e-muztar kī tamannā thī yahī

aap ke dar ke gadāoñ se lipaT kar ro leñ

abr chhāyā hai havā.eñ haiñ madīne se haiñ duur

jī taḌaptā hai ghaTāoñ se lipaT kar ro leñ

hashr meñ in ke sabab vo mutavajjah hoñge

kyuuñ na ham apnī ḳhatāoñ se lipaT kar ro leñ

ham se behtar haiñ ki un tak ye pahuñch jaatī haiñ

inhī ḳhush-baḳht duāoñ se lipaT kar ro leñ

karbalā hī ke tasavvur se ye aatā hai ḳhayāl

dahr kī saarī balāoñ se lipaT kar ro leñ

qadr-dāñ in ke haiñ jab vo shah-e-ḳhūbān-e-jahāñ

'tahniyat' apnī vafāoñ se lipaT kar ro leñ

faiz-mamur fazaon se lipaT kar ro len

phir madine ki hawaon se lipaT kar ro len

waqt-e-ruKHsat dil-e-muztar ki tamanna thi yahi

aap ke dar ke gadaon se lipaT kar ro len

abr chhaya hai hawaen hain madine se hain dur

ji taDapta hai ghaTaon se lipaT kar ro len

hashr mein in ke sabab wo mutawajjah honge

kyun na hum apni KHataon se lipaT kar ro len

hum se behtar hain ki un tak ye pahunch jati hain

inhi KHush-baKHt duaon se lipaT kar ro len

karbala hi ke tasawwur se ye aata hai KHayal

dahr ki sari balaon se lipaT kar ro len

qadr-dan in ke hain jab wo shah-e-KHuban-e-jahan

'tahniyat' apni wafaon se lipaT kar ro len