falak ka har sitara mah-e-taban ho nahin sakta

falak kā har sitāra māh-e-tābāñ ho nahīñ saktā

har ik zarra kabhī mahr-e-daraḳhshāñ ho nahīñ saktā

har ik chashme kā paanī āb-e-haivāñ ho nahīñ saktā

har ik qatra jo girtā hai vo naisāñ ho nahīñ saktā

jo bulbul se ho ḳhālī vo gulistāñ ho nahīñ saktā

jo dard-e-dil se ḳhālī ho vo insāñ ho nahīñ saktā

chaman kā bāġhbāñ koī sitam-rāñ ho nahīñ saktā

koī sayyād bulbul kā nigahbāñ ho nahīñ saktā

jahāñ par hoñ 'arastū' aur 'luqmāñ' zīnat-e-mahfil

vahāñ kā sadr-e-mahfil koī nādāñ ho nahīñ saktā

vafā kar ke bhī ham haiñ taḳhta-e-mashq-e+sitam-rānī

jafā-kāroñ se apnā ahd-o-paimāñ ho nahīñ saktā

dharam ko diin ko maz.hab ko aapas meñ jo Takrā.e

vo hindū ho nahīñ saktā musalmāñ ho nahīñ saktā

tire bahr-e-sukūñ meñ ek tūfāñ kī zarūrat hai

taḌap paidā na ho jab tak vo tūfāñ ho nahīñ saktā

uThā lā.ūñ na jab tak āsmāñ se māh-o-anjum ko

mire zulmat-kade meñ yuuñ charāġhāñ ho nahīñ saktā

chaman vaalo na ho jis ḳhuuñ meñ rang-o-bū-e-āzādī

kaTā kar sar bhī vo ḳhūn-e-shahīdāñ ho nahīñ saktā

'nishāt'-e-dil-hazīñ Takrā.eñge jā kar falak se ye

agar in dard ke nāloñ kā darmāñ ho nahīñ saktā

falak ka har sitara mah-e-taban ho nahin sakta

har ek zarra kabhi mahr-e-daraKHshan ho nahin sakta

har ek chashme ka pani aab-e-haiwan ho nahin sakta

har ek qatra jo girta hai wo naisan ho nahin sakta

jo bulbul se ho KHali wo gulistan ho nahin sakta

jo dard-e-dil se KHali ho wo insan ho nahin sakta

chaman ka baghban koi sitam-ran ho nahin sakta

koi sayyaad bulbul ka nigahban ho nahin sakta

jahan par hon 'arastu' aur 'luqman' zinat-e-mahfil

wahan ka sadr-e-mahfil koi nadan ho nahin sakta

wafa kar ke bhi hum hain taKHta-e-mashq-e+sitam-rani

jafa-karon se apna ahd-o-paiman ho nahin sakta

dharam ko din ko mazhab ko aapas mein jo Takrae

wo hindu ho nahin sakta musalman ho nahin sakta

tere bahr-e-sukun mein ek tufan ki zarurat hai

taDap paida na ho jab tak wo tufan ho nahin sakta

uTha laun na jab tak aasman se mah-o-anjum ko

mere zulmat-kade mein yun charaghan ho nahin sakta

chaman walo na ho jis KHun mein rang-o-bu-e-azadi

kaTa kar sar bhi wo KHun-e-shahidan ho nahin sakta

'nishat'-e-dil-hazin Takraenge ja kar falak se ye

agar in dard ke nalon ka darman ho nahin sakta