falak ne bheje hain kya jaane kis wasile se

falak ne bheje haiñ kyā jaane kis vasīle se

lahū ke bahr meñ bhī kuchh sadaf haiñ niile se

abhī to qāfila-e-bād sabz raah meñ hai

isī liye to haiñ ashjār-e-dasht piile se

jo mere saath hai sadiyoñ se misl-e-aks-e-bahār

ḳhabar nahīñ ki hai vo shaḳhs kis qabīle se

paḌā hai kab se siyah-posh merā dasht-e-badan

charāġh is meñ jalā de kisī bhī hiile se

qayās kahtā hai un ke aqab meñ hai sūraj

chamak rahe haiñ ufaq par jo zard Tiile se

hai lams-e-āb se mahrūm dasht-e-ḳhāk-o-havā

na jaane kis liye zarrāt phir haiñ giile se

ragoñ meñ aaj bhī raushan haiñ surḳh-o-zard charāġh

ajiib shai the vo ishrat badan nashīle se

falak ne bheje hain kya jaane kis wasile se

lahu ke bahr mein bhi kuchh sadaf hain nile se

abhi to qafila-e-baad sabz rah mein hai

isi liye to hain ashjar-e-dasht pile se

jo mere sath hai sadiyon se misl-e-aks-e-bahaar

KHabar nahin ki hai wo shaKHs kis qabile se

paDa hai kab se siyah-posh mera dasht-e-badan

charagh is mein jala de kisi bhi hile se

qayas kahta hai un ke aqab mein hai suraj

chamak rahe hain ufaq par jo zard Tile se

hai lams-e-ab se mahrum dasht-e-KHak-o-hawa

na jaane kis liye zarraat phir hain gile se

ragon mein aaj bhi raushan hain surKH-o-zard charagh

ajib shai the wo ishrat badan nashile se