falak pe barq chamakti ki chandni hoti

falak pe barq chamaktī ki chāñdnī hotī

kisī tarah to mire ghar meñ raushnī hotī

bachā liyā hai mujhe ḳhud-kushī se logoñ ne

vagarna shahr meñ kal sub.h sansanī hotī

maiñ kah rahā thā na sonā uchhālte chaliye

kahā to mānte hargiz na rahzanī hotī

bigaḌ ga.ī hai to sab uñgliyāñ uThāte haiñ

na kahtā kuchh bhī koī baat agar banī hotī

ye taar taar libāda liye hī kyoñ phirtā

jo mere ghar meñ kahīñ koī alganī hotī

to maiñ bhī chāñdī ke sikkoñ meñ ḳhud ko tulvātā

mujhe jo raah mohabbat kī chhoḌnī hotī

malāl ye hai vo bin baat rūThe baiThe haiñ

vo baat alag thī agar kuchh kahā sunī hotī

jo chāhtā thā maiñ 'gulshan' vo mil bhī saktā thā

agar zabān meñ thoḌī sī chāshnī hotī

falak pe barq chamakti ki chandni hoti

kisi tarah to mere ghar mein raushni hoti

bacha liya hai mujhe KHud-kushi se logon ne

wagarna shahr mein kal subh sansani hoti

main kah raha tha na sona uchhaalte chaliye

kaha to mante hargiz na rahzani hoti

bigaD gai hai to sab ungliyan uThate hain

na kahta kuchh bhi koi baat agar bani hoti

ye tar tar libaada liye hi kyon phirta

jo mere ghar mein kahin koi algani hoti

to main bhi chandi ke sikkon mein KHud ko tulwata

mujhe jo rah mohabbat ki chhoDni hoti

malal ye hai wo bin baat ruThe baiThe hain

wo baat alag thi agar kuchh kaha suni hoti

jo chahta tha main 'gulshan' wo mil bhi sakta tha

agar zaban mein thoDi si chashni hoti