falak pe chand dharti par nazare raqs karte hain

falak pe chāñd dhartī par nazāre raqs karte haiñ

maiñ shab ko baam par aa.uuñ sitāre raqs karte haiñ

tire aane pe jo aksar ḳhushī se maiñ pakaḌtī huuñ

mire hāthoñ ko chhūkar vo ġhubāre raqs karte haiñ

shab-e-furqat ko maiñ jab zindagī meñ joḌnā chāhūñ

judā.ī meñ uThā.e jo ḳhasāre raqs karte haiñ

kabhī hāthoñ meñ le kar haath ham chalte haiñ sāhil par

jo paañv paanī meñ rakkheñ kināre raqs karte haiñ

na jaane kyoñ achānak apnī āñkheñ band kartī huuñ

tire shānoñ pe jab gesū hamāre raqs karte haiñ

kabhī nazreñ churā kar terī jānib dekh letī huuñ

tirī āñkhoñ meñ dekhūñ to ishāre raqs karte haiñ

falak pe chand dharti par nazare raqs karte hain

main shab ko baam par aaun sitare raqs karte hain

tere aane pe jo aksar KHushi se main pakaDti hun

mere hathon ko chhukar wo ghubare raqs karte hain

shab-e-furqat ko main jab zindagi mein joDna chahun

judai mein uThae jo KHasare raqs karte hain

kabhi hathon mein le kar hath hum chalte hain sahil par

jo panw pani mein rakkhen kinare raqs karte hain

na jaane kyon achanak apni aankhen band karti hun

tere shanon pe jab gesu hamare raqs karte hain

kabhi nazren chura kar teri jaanib dekh leti hun

teri aankhon mein dekhun to ishaare raqs karte hain