falak pe chand hai aur pas ek sitara hai

falak pe chāñd hai aur paas ik sitāra hai

ye terī merī mohabbat kā isti.āra hai

shab-o-sahar ke tasalsul meñ ye tulū-o-ġhurūb

samajhne vāloñ ko ik dukh-bharā ishāra hai

ye tere sozan-e-mizhgāñ ke bas kī baat nahīñ

yahāñ to pairahan-e-jāñ hī pāra-pāra hai

faqat karishma-e-tarz-e-nazar hai sūd-o-ziyāñ

kisī kā naf.a kisī ke liye ḳhasāra hai

vo jis ne mujh ko kahīñ kā nahīñ rakhā ik umr

vahī ḳhayāl vahī aarzū dobāra hai

na.ī jagah mujhe mānūs sī lagī to khulā

ye koī ḳhvāb meñ dekhā huā nazāra hai

yahāñ se jo bhī gayā lauT kar nahīñ aayā

batā.e kaun kahāñ dūsrā kināra hai

falak pe chand hai aur pas ek sitara hai

ye teri meri mohabbat ka istiara hai

shab-o-sahar ke tasalsul mein ye tulu-o-ghurub

samajhne walon ko ek dukh-bhara ishaara hai

ye tere sozan-e-mizhgan ke bas ki baat nahin

yahan to pairahan-e-jaan hi para-para hai

faqat karishma-e-tarz-e-nazar hai sud-o-ziyan

kisi ka nafa kisi ke liye KHasara hai

wo jis ne mujh ko kahin ka nahin rakha ek umr

wahi KHayal wahi aarzu dobara hai

nai jagah mujhe manus si lagi to khula

ye koi KHwab mein dekha hua nazara hai

yahan se jo bhi gaya lauT kar nahin aaya

batae kaun kahan dusra kinara hai