falak pe sham Dhale jo chamakne lagte hain

falak pe shaam Dhale jo chamakne lagte haiñ

vo terī āñkhoñ meñ aa kar damakne lagte haiñ

sukūt-e-shab maiñ tirā naam jab bhī letā huuñ

sahīfe ishq ke dil par utarne lagte haiñ

ġhamoñ kī kaalī ghaTāoñ ko chiir kar jānāñ

tirī tajallī ke sūraj dahakne lagte haiñ

chaman chaman meñ khile phuul le ke naam tirā

tasavvurāt ke gulshan mahakne lagte haiñ

tirī sadāoñ ke ghuñghrū fazā meñ yuuñ chhanke

ki jaise baaġh meñ bulbul chahakne lagte haiñ

tū be-irāda bhī jab zulf apnī jhaTkā.e

sulagte dasht pe bādal barasne lagte haiñ

tū jaan toḌ ke letī hai jab bhī añgḌā.ī

ḳhutūt-e-jism ḳhalā meñ ubharne lagte lagte haiñ

tire junūñ kā bhī 'ejāz' kyā mudāvā ho

ki chhīl lete ho jab zaḳhm bharne lagte haiñ

falak pe sham Dhale jo chamakne lagte hain

wo teri aankhon mein aa kar damakne lagte hain

sukut-e-shab main tera nam jab bhi leta hun

sahife ishq ke dil par utarne lagte hain

ghamon ki kali ghaTaon ko chir kar jaanan

teri tajalli ke suraj dahakne lagte hain

chaman chaman mein khile phul le ke nam tera

tasawwuraat ke gulshan mahakne lagte hain

teri sadaon ke ghunghru faza mein yun chhanke

ki jaise bagh mein bulbul chahakne lagte hain

tu be-irada bhi jab zulf apni jhaTkae

sulagte dasht pe baadal barasne lagte hain

tu jaan toD ke leti hai jab bhi angDai

KHutut-e-jism KHala mein ubharne lagte lagte hain

tere junun ka bhi 'ejaz' kya mudawa ho

ki chhil lete ho jab zaKHm bharne lagte hain