falak to kya zamin par bhi nahin hain

falak to kyā zamīñ par bhī nahīñ haiñ

mire paañv kahīñ par bhī nahīñ haiñ

kabhī aañsū gumāñ par mutma.in the

magar ab to yaqīñ par bhī nahīñ haiñ

ye kab uḌne kī bāteñ kar rahe ho

abhī mausam nahīñ par bhī nahīñ haiñ

jo ham haiñ daad se mahrūm to kyā

zabān-e-nukta-chīñ par bhī nahīñ haiñ

kareñ kyā mutma.in 'āsim' kisī ko

makāñ apne makīñ par bhī nahīñ haiñ

falak to kya zamin par bhi nahin hain

mere panw kahin par bhi nahin hain

kabhi aansu guman par mutmain the

magar ab to yaqin par bhi nahin hain

ye kab uDne ki baaten kar rahe ho

abhi mausam nahin par bhi nahin hain

jo hum hain dad se mahrum to kya

zaban-e-nukta-chin par bhi nahin hain

karen kya mutmain 'asim' kisi ko

makan apne makin par bhi nahin hain