fan wo hai but-gari ka ki fan bolne lage

fan vo hai but-garī kā ki fan bolne lage

harkat sī ho laboñ pe dahan bolne lage

jur.at kahāñ se laa.e koī arz-e-hāl kī

jab husn kī jabīñ pe shikan bolne lage

sūrat-garo hai fan kā tumhāre yahī kamāl

tasvīr kī zabān se fan bolne lage

vīrāna-sāziyoñ kā hunar ham ko aa gayā

aisā na ho ki shahr meñ ban bolne lage

gul-būTe jhūmne lageñ taa.ir hoñ naġhma-ḳhvāñ

tum jaao sair ko to chaman bolne lage

likhiye 'shafīq' aisī salāsat se har ġhazal

misl-e-janāb-e-'dāġh' suḳhan bolne lage

fan wo hai but-gari ka ki fan bolne lage

harkat si ho labon pe dahan bolne lage

jurat kahan se lae koi arz-e-haal ki

jab husn ki jabin pe shikan bolne lage

surat-garo hai fan ka tumhaare yahi kamal

taswir ki zaban se fan bolne lage

virana-saziyon ka hunar hum ko aa gaya

aisa na ho ki shahr mein ban bolne lage

gul-buTe jhumne lagen tair hon naghma-KHwan

tum jao sair ko to chaman bolne lage

likhiye 'shafiq' aisi salasat se har ghazal

misl-e-janab-e-'dagh' suKHan bolne lage