fana hua koi yahan KHitab koi le gaya

fanā huā koī yahāñ ḳhitāb koī le gayā

ibādateñ kisī kī thiiñ savāb koī le gayā

vafā ke jaam ke liye sajā.e ham ne mai-kade

magar laboñ se chhīn kar sharāb koī le gayā

thī pyaar kī fazā magar zabāñ khulī na lab hile

sitam ye us pe aañkh se bhī aab koī le gayā

ye ḳhushbueñ bikher ke milā hī kyā bahār ko

laraztī shāḳh rah ga.ī gulāb koī le gayā

fasād kī haqīqateñ likhī thiiñ jis meñ harf harf

varaq varaq masal ke vo kitāb koī le gayā

sukūn is tarah luTā dil-e-vafā-shi.ār kā

jo umr-bhar sajā.e the vo ḳhvāb koī le gayā

fareb-e-pāk-dāmanī qadam qadam pe laġhzisheñ

vo 'āmir' aaj umr kā hisāb koī le gayā

fana hua koi yahan KHitab koi le gaya

ibaadaten kisi ki thin sawab koi le gaya

wafa ke jam ke liye sajae hum ne mai-kade

magar labon se chhin kar sharab koi le gaya

thi pyar ki faza magar zaban khuli na lab hile

sitam ye us pe aankh se bhi aab koi le gaya

ye KHushbuen bikher ke mila hi kya bahaar ko

larazti shaKH rah gai gulab koi le gaya

fasad ki haqiqaten likhi thin jis mein harf harf

waraq waraq masal ke wo kitab koi le gaya

sukun is tarah luTa dil-e-wafa-shiar ka

jo umr-bhar sajae the wo KHwab koi le gaya

fareb-e-pak-damani qadam qadam pe laghzishen

wo 'amir' aaj umr ka hisab koi le gaya