faqat do hichkiyon mein KHatm qissa sham-e-gham ka hai

faqat do hichkiyoñ meñ ḳhatm qissa shām-e-ġham kā hai

charāġh-e-zindagī ab saath terā koī dam kā hai

asar ye ābla-pāyān-e-ulfat ke qadam kā hai

jahāñ ke goshe goshe par gumāñ bāġh-e-iram kā hai

chalī jaatī hai duniyā kārvāñ-dar-kārvāñ ho kar

ilāhī kyā ilāqa mulk-e-hastī se adam kā hai

ye ka.abe meñ kahāñ le aa.e mere ham-safar mujh ko

dil-e-vahshī to shaidā lailā-e-zulf-e-sanam kā hai

Thahar be-sabr dil vo be-takalluf hote jaate haiñ

ye chilman koī saa.at kī ye parda koī dam kā hai

vo lutf-e-bandagī-o-shān-e-āqā.ī ko kyā jaane

dil-e-vā.iz to shaidā.ī faqat bāġh-e-iram kā hai

abas jam.iyyat-e-dil kī tamanna hai yahāñ 'muslim'

ye duniyā ek afsāna ġham-o-dard-o-alam kā hai

faqat do hichkiyon mein KHatm qissa sham-e-gham ka hai

charagh-e-zindagi ab sath tera koi dam ka hai

asar ye aabla-payan-e-ulfat ke qadam ka hai

jahan ke goshe goshe par guman bagh-e-iram ka hai

chali jati hai duniya karwan-dar-karwan ho kar

ilahi kya ilaqa mulk-e-hasti se adam ka hai

ye kabe mein kahan le aae mere ham-safar mujh ko

dil-e-wahshi to shaida laila-e-zulf-e-sanam ka hai

Thahar be-sabr dil wo be-takalluf hote jate hain

ye chilman koi saat ki ye parda koi dam ka hai

wo lutf-e-bandagi-o-shan-e-aqai ko kya jaane

dil-e-waiz to shaidai faqat bagh-e-iram ka hai

abas jamiyyat-e-dil ki tamanna hai yahan 'muslim'

ye duniya ek afsana gham-o-dard-o-alam ka hai