faqat hamin ko nahin be-qarar karte hain

faqat hamīñ ko nahīñ be-qarār karte haiñ

vo ḳhud bhī jāgte haiñ intizār karte haiñ

kahīñ jo 'ishq meñ miTne kī baat chaltī hai

hamārā zikr bhī vo baar baar karte haiñ

kisī kā husn nigāhoñ meñ ab nahīñ jachtā

qasam ḳhudā kī faqat tum se pyaar karte haiñ

unheñ na tiir na talvār kī zarūrat hai

vo dil pe apnī nigāhoñ se vaar karte haiñ

har ek baat se zāhir hai bevafā ho magar

har ek baat kā ham e'tibār karte haiñ

tamām din tire milne kī aas rahtī hai

tamām raat tirā intizār karte haiñ

sunā hai yaad satātī hai jin kī 'soz' hameñ

vo yaad karte haiñ aur baar baar karte haiñ

faqat hamin ko nahin be-qarar karte hain

wo KHud bhi jagte hain intizar karte hain

kahin jo 'ishq mein miTne ki baat chalti hai

hamara zikr bhi wo bar bar karte hain

kisi ka husn nigahon mein ab nahin jachta

qasam KHuda ki faqat tum se pyar karte hain

unhen na tir na talwar ki zarurat hai

wo dil pe apni nigahon se war karte hain

har ek baat se zahir hai bewafa ho magar

har ek baat ka hum e'tibar karte hain

tamam din tere milne ki aas rahti hai

tamam raat tera intizar karte hain

suna hai yaad satati hai jin ki 'soz' hamein

wo yaad karte hain aur bar bar karte hain