faqat ek lafz hun tanha agar tafsil ho jaun sanwar jaun

faqat ik lafz huuñ tanhā agar tafsīl ho jā.ūñ sañvar jā.ūñ

abhī to ḳhaak huuñ maiñ ḳhaak meñ tahlīl ho jā.ūñ sañvar jā.ūñ

abhī tak shaḳhsiyat ek nā-mukammal ḳhvāb jaisī hai adhūrī hai

kisī din mo.ajiza ho aap hī takmīl ho jā.ūñ sañvar jā.ūñ

mujhe shab ke añdheroñ meñ abhī kitnā jhulasnā hai samajhnā hai

magar jalte hue yūñhī kabhī qindīl ho jā.ūñ sañvar jā.ūñ

bhaTaktā huuñ tire dīdār kī ḳhvāhish liye aksar kināroñ par

tamannā hai tirī āñkhoñ kī gahrī jhiil ho jā.ūñ sañvar jā.ūñ

maiñ sañg-e-mīl ke lahje meñ sab se baat kartā huuñ so rasta huuñ

agarche manziloñ kī shakl meñ tabdīl ho jā.ūñ sañvar jā.ūñ

shajar āñkhoñ se ojhal nā kisī dīvār kā saaya nazar aayā

ḳhudārā ab kisī bādal kī hī tamsīl ho jā.ūñ sañvar jā.ūñ

faqat ek lafz hun tanha agar tafsil ho jaun sanwar jaun

abhi to KHak hun main KHak mein tahlil ho jaun sanwar jaun

abhi tak shaKHsiyat ek na-mukammal KHwab jaisi hai adhuri hai

kisi din moajiza ho aap hi takmil ho jaun sanwar jaun

mujhe shab ke andheron mein abhi kitna jhulasna hai samajhna hai

magar jalte hue yunhi kabhi qindil ho jaun sanwar jaun

bhaTakta hun tere didar ki KHwahish liye aksar kinaron par

tamanna hai teri aankhon ki gahri jhil ho jaun sanwar jaun

main sang-e-mil ke lahje mein sab se baat karta hun so rasta hun

agarche manzilon ki shakl mein tabdil ho jaun sanwar jaun

shajar aankhon se ojhal na kisi diwar ka saya nazar aaya

KHudara ab kisi baadal ki hi tamsil ho jaun sanwar jaun