faqat lafz-o-bayan se bhi kahin banti hain taqdiren

faqat lafz-o-bayāñ se bhī kahīñ bantī haiñ taqdīreñ

agar ho jazba-e-kāmil to ḳhud TūTeñgī zanjīreñ

huā rusvā-e-ālam vo jo uThThā bazm-e-jānāñ se

ki zulf-e-dost ke saa.e meñ poshīda haiñ tauqīreñ

javāñ hoñ valvale jin ke azā.em jin ke mohkam hoñ

vo qaumeñ toḌtī haiñ apnī mahkūmī kī zanjīreñ

nizām-e-maikada barham huā jaatā hai kyoñ saaqī

huī jaatī haiñ kyoñ nākām bahbūdī kī tadbīreñ

kahāñ mahfil meñ mujh ko lab hilāne kī ijāzat hai

lagā dī hai mirī guftār par zālim ne ta.azīreñ

sharāfat ke pas-e-parda jahāñ qatl-e-sharāfat ho

vahāñ rahtī nahīñ aslāf kī anmol jāgīreñ

ba-zor-e-quvvat-e-bāzū ba-faiz-e-jazba-e-kāmil

badal dete haiñ 'nayyar' ahl-e-himmat apnī taqdīreñ

faqat lafz-o-bayan se bhi kahin banti hain taqdiren

agar ho jazba-e-kaamil to KHud TuTengi zanjiren

hua ruswa-e-alam wo jo uThTha bazm-e-jaanan se

ki zulf-e-dost ke sae mein poshida hain tauqiren

jawan hon walwale jin ke azaem jin ke mohkam hon

wo qaumen toDti hain apni mahkumi ki zanjiren

nizam-e-maikada barham hua jata hai kyon saqi

hui jati hain kyon nakaam bahbudi ki tadbiren

kahan mahfil mein mujh ko lab hilane ki ijazat hai

laga di hai meri guftar par zalim ne taziren

sharafat ke pas-e-parda jahan qatl-e-sharafat ho

wahan rahti nahin aslaf ki anmol jagiren

ba-zor-e-quwwat-e-bazu ba-faiz-e-jazba-e-kaamil

badal dete hain 'nayyar' ahl-e-himmat apni taqdiren