faqat main kyon rahun ruswa teri ruswai bhi to ho

faqat maiñ kyoñ rahūñ rusvā tirī rusvā.ī bhī to ho

sitamgar terī mahfil meñ shab-e-tanhā.ī bhī to ho

tujhe paane kī ḳhvāhish meñ jo rakh de jaan bhī girvī

zamāne meñ mire jaisā koī saudā.ī bhī to ho

maiñ tum ko bevafā kahtā huuñ to is meñ burā kyā hai

ye maanā maiñ ki tum apne ho magar harjā.ī bhī to ho

maiñ kaise Duub saktā huuñ vafā ke ḳhushk dariyā meñ

tire dariyā-e-ulfat meñ koī gahrā.ī bhī to ho

shab-e-furqat kā har lamha sitāre gin ke kaaTā hai

bichhaḌ ke tujh se ik pal ko hameñ niiñd aa.ī bhī to ho

maiñ kaise maan luuñ tū hijr meñ rahtā hai nam-dīda

tirī āvāz merī tarah se bharrā.ī bhī to ho

masarrat ke tarāne kyā sunā.eñ sāz-e-ġham par ham

ḳhushī ke giit gaane ke liye shahnā.ī bhī to ho

'hilāl' apne muqaddar meñ nahīñ thā vasl-e-jānāna

duā ham ne bahut kī thī magar bar aa.ī bhī to ho

faqat main kyon rahun ruswa teri ruswai bhi to ho

sitamgar teri mahfil mein shab-e-tanhai bhi to ho

tujhe pane ki KHwahish mein jo rakh de jaan bhi girwi

zamane mein mere jaisa koi saudai bhi to ho

main tum ko bewafa kahta hun to is mein bura kya hai

ye mana main ki tum apne ho magar harjai bhi to ho

main kaise Dub sakta hun wafa ke KHushk dariya mein

tere dariya-e-ulfat mein koi gahrai bhi to ho

shab-e-furqat ka har lamha sitare gin ke kaTa hai

bichhaD ke tujh se ek pal ko hamein nind aai bhi to ho

main kaise man lun tu hijr mein rahta hai nam-dida

teri aawaz meri tarah se bharrai bhi to ho

masarrat ke tarane kya sunaen saz-e-gham par hum

KHushi ke git gane ke liye shahnai bhi to ho

'hilal' apne muqaddar mein nahin tha wasl-e-jaanana

dua hum ne bahut ki thi magar bar aai bhi to ho