faqat ye wasta hai zindagi se

faqat ye vāsta hai zindagī se

tumhārī baat karte haiñ kisī se

añdherā hī añdherā hai falak par

judā hai chāñd apnī chāñdnī se

mirā apnā nahīñ koī magar maiñ

muḳhātib ho rahā huuñ har kisī se

payāde shor barpā.e hue haiñ

masīhā sun rahā hai ḳhāmushī se

vo mere paas aatī jā rahī hai

magar matlab hai merī shā'irī se

ġhamoñ kī chādareñ sab pheñk bhī duuñ

agar kuchh farq paḌtā ho ḳhushī se

kuaañ hai pyaas hai paanī nahīñ hai

musāfir mar rahā hai bebasī se

ta'alluq thā na koī dushmanī thī

amaañ maare ga.e ham dil-lagī se

ye gahre zaḳhm de kar ke na jaa.e

zarā sā bach ke chaliye sādgī se

mohabbat dhaar hai chaḌhtī nadī kī

ye sāhil bolte kab haiñ nadī se

faqat ye wasta hai zindagi se

tumhaari baat karte hain kisi se

andhera hi andhera hai falak par

juda hai chand apni chandni se

mera apna nahin koi magar main

muKHatib ho raha hun har kisi se

payaade shor barpae hue hain

masiha sun raha hai KHamushi se

wo mere pas aati ja rahi hai

magar matlab hai meri sha'iri se

ghamon ki chadaren sab phenk bhi dun

agar kuchh farq paDta ho KHushi se

kuan hai pyas hai pani nahin hai

musafir mar raha hai bebasi se

ta'alluq tha na koi dushmani thi

aman mare gae hum dil-lagi se

ye gahre zaKHm de kar ke na jae

zara sa bach ke chaliye sadgi se

mohabbat dhaar hai chaDhti nadi ki

ye sahil bolte kab hain nadi se