faqat yunhi to nahin naz-afrin hai wo

faqat yūñhī to nahīñ nāz-āfrīñ hai vo

mirī nigāh se dekho bahut hasīñ hai vo

hai misl-e-uqda mirī zaat se vo paivasta

jahāñ-jahāñ maiñ nahīñ huuñ vahīñ vahīñ hai vo

tum us ke rang-e-ruḳh-o-lab kī baat karte ho

ḳhud apnī ātish-e-tevar se ātishīñ hai vo

kabhī na sard huā merī zaat kā dozaḳh

kisī ne sach hī kahā hai jahannamīñ hai vo

hai is asar se hī ḳhūñ-rez chashm-e-nāz us kī

ki muddatoñ se ragoñ meñ panah-guzīñ hai vo

vo kaise ā.ina-e-inhimāk meñ aa.e

ki lamha bhar ko bhī mujh se judā nahīñ hai vo

jab us ko dekh ke aatā hai yaad rab mujh ko

to kyoñ kahūñ ki harīf-e-ḳhudā-o-dīñ hai vo

vo jis tarah nazar-andāz kar rahā hai mujhe

to lag rahā hai ki ġhāfil zarā nahīñ hai vo

miTā chukā huuñ sabhī naqsh us ke qadmoñ ke

magar ye vahm hai ab bhī yahīñ kahīñ hai vo

faqat yunhi to nahin naz-afrin hai wo

meri nigah se dekho bahut hasin hai wo

hai misl-e-uqda meri zat se wo paiwasta

jahan-jahan main nahin hun wahin wahin hai wo

tum us ke rang-e-ruKH-o-lab ki baat karte ho

KHud apni aatish-e-tewar se aatishin hai wo

kabhi na sard hua meri zat ka dozaKH

kisi ne sach hi kaha hai jahannamin hai wo

hai is asar se hi KHun-rez chashm-e-naz us ki

ki muddaton se ragon mein panah-guzin hai wo

wo kaise aaina-e-inhimak mein aae

ki lamha bhar ko bhi mujh se juda nahin hai wo

jab us ko dekh ke aata hai yaad rab mujh ko

to kyon kahun ki harif-e-KHuda-o-din hai wo

wo jis tarah nazar-andaz kar raha hai mujhe

to lag raha hai ki ghafil zara nahin hai wo

miTa chuka hun sabhi naqsh us ke qadmon ke

magar ye wahm hai ab bhi yahin kahin hai wo