faqir hun main mera kaam hai sada dena

faqīr huuñ maiñ mirā kaam hai sadā denā

mirā shi.ār hai qātil ko bhī duā denā

ġham-e-firāq meñ jiinā bhī ik qayāmat hai

mire ḳhudā mujhe jiine kā hausla denā

salīb-o-dār ho sahrā ho yā ki maqtal ho

jahāñ ho merī zarūrat mujhe sadā denā

vafā-shi.ār agar ho koī to mujrim hai

vafā-sarisht meñ kyoñ hoñ mujhe sazā denā

kahāñ maiñ gum huuñ kahīñ mujh ko DhūñD lo yaaro

agar milūñ to mujhe bhī mirā pata denā

anā bahut hai maiñ sarkash bhī huuñ bahut lekin

ḳhudā ke naam pe aatā hai sar jhukā denā

tamām umr guzārī hai ishq meñ jis ke

'payām' sahl nahīñ hai use bhulā denā

faqir hun main mera kaam hai sada dena

mera shiar hai qatil ko bhi dua dena

gham-e-firaq mein jina bhi ek qayamat hai

mere KHuda mujhe jine ka hausla dena

salib-o-dar ho sahra ho ya ki maqtal ho

jahan ho meri zarurat mujhe sada dena

wafa-shiar agar ho koi to mujrim hai

wafa-sarisht mein kyon hon mujhe saza dena

kahan main gum hun kahin mujh ko DhunD lo yaro

agar milun to mujhe bhi mera pata dena

ana bahut hai main sarkash bhi hun bahut lekin

KHuda ke nam pe aata hai sar jhuka dena

tamam umr guzari hai ishq mein jis ke

'payam' sahl nahin hai use bhula dena