faraham jis qadar ishrat ke saman hote jate hain

farāham jis qadar ishrat ke sāmāñ hote jaate haiñ

sukūn-e-rūh se mahrūm insāñ hote jaate haiñ

kabhī tarz-e-taġhāful the yahī andāz-e-mahbūbī

jo ab sarf-e-navāzish-hā-e-pinhāñ hote jaate haiñ

shabāb-o-husn-e-roz-afzūñ kā un ke kuchh ye aalam hai

ki ham sharminda-e-shauq-e-farāvāñ hote jaate haiñ

abhī jām-e-mai-e-rañgīñ lab-e-lālīñ tak aayā hai

magar āñkhoñ meñ maiḳhāne se ġhaltāñ hote jaate haiñ

fazā-e-ḳhuld par jaise ghaTā.eñ chhā.ī jaatī hoñ

ruḳh-e-gul-rañg par gesū pareshāñ hote jaate haiñ

nafas kī āmad-o-shud kā ye aalam hai judā.ī meñ

ki nashtar jaise paivast-e-rag-e-jāñ hote jaate haiñ

ta.ālallāh faiz-e-bāġhbāñ 'bismil' ta.ālallāh

ḳhas-o-ḳhāshāk-e-gulshan gul-ba-dāmāñ hote jaate haiñ

faraham jis qadar ishrat ke saman hote jate hain

sukun-e-ruh se mahrum insan hote jate hain

kabhi tarz-e-taghaful the yahi andaz-e-mahbubi

jo ab sarf-e-nawazish-ha-e-pinhan hote jate hain

shabab-o-husn-e-roz-afzun ka un ke kuchh ye aalam hai

ki hum sharminda-e-shauq-e-farawan hote jate hain

abhi jam-e-mai-e-rangin lab-e-lalin tak aaya hai

magar aankhon mein maiKHane se ghaltan hote jate hain

faza-e-KHuld par jaise ghaTaen chhai jati hon

ruKH-e-gul-rang par gesu pareshan hote jate hain

nafas ki aamad-o-shud ka ye aalam hai judai mein

ki nashtar jaise paiwast-e-rag-e-jaan hote jate hain

taalallah faiz-e-baghban 'bismil' taalallah

KHas-o-KHashak-e-gulshan gul-ba-daman hote jate hain