fareb duniya mein kya kya dikhai deta hai

fareb duniyā meñ kyā kyā dikhā.ī detā hai

sarāb duur se dariyā dikhā.ī detā hai

kahāñ se lā.ūñ maiñ kirdār is kahānī meñ

jab ek shaḳhs hī duniyā dikhā.ī detā hai

maiñ apnī āñkhoñ pe jab ḳhvāb oḌh letā huuñ

tumhārā chāñd sā chehra dikhā.ī detā hai

maiñ terā dard samajhtā huuñ tū bhī merī tarah

hamesha mujh ko akelā dikhā.ī detā hai

nigāh-e-shauq tahayyur ke chaak par rakh kar

har ik badan mujhe kuuza dikhā.ī detā hai

jo ḳhvāb niiñd meñ tā'mīr hotā rahtā hai

vo aañkh khulne pe malba dikhā.ī detā hai

jab intishār-ḳhayālī meñ aa.ina dekhūñ

to apnā 'aks bhī dhuñdlā dikhā.ī detā hai

fareb duniya mein kya kya dikhai deta hai

sarab dur se dariya dikhai deta hai

kahan se laun main kirdar is kahani mein

jab ek shaKHs hi duniya dikhai deta hai

main apni aankhon pe jab KHwab oDh leta hun

tumhaara chand sa chehra dikhai deta hai

main tera dard samajhta hun tu bhi meri tarah

hamesha mujh ko akela dikhai deta hai

nigah-e-shauq tahayyur ke chaak par rakh kar

har ek badan mujhe kuza dikhai deta hai

jo KHwab nind mein ta'mir hota rahta hai

wo aankh khulne pe malba dikhai deta hai

jab intishaar-KHayali mein aaina dekhun

to apna 'aks bhi dhundla dikhai deta hai