fareb-e-shauq na de waqf-e-imtihan na bana

fareb-e-shauq na de vaqf-e-imtihāñ na banā

mirī talab ko bas ab aur bhī girāñ na banā

'atā-e-dost hai ye jins-e-rā.egāñ na banā

tujhe jo dard milā hai use fuġhāñ na banā

banānā chāhe to ab bijliyoñ se de tartīb

chaman meñ ab kabhī tinkoñ kā āshiyāñ na banā

kabhī vo fā.ez-e-jalva hai aur kabhī mahrūm

mujhe ḳhud apne hī dil se tū bad-gumāñ na banā

sabhī ko ho gayā ab tere 'ishq kā dā'vā

kahā to thā ki mohabbat ko dāstāñ na banā

halāk-e-dard-e-mohabbat mujhī ko rahne de

nigāh-e-nāz ko ġhārat-gar-e-jahāñ na banā

rahā 'azāb meñ dil kā mu'āmla 'maikash'

rah-e-vafā meñ koī bhī tū rāz-dāñ na banā

fareb-e-shauq na de waqf-e-imtihan na bana

meri talab ko bas ab aur bhi giran na bana

'ata-e-dost hai ye jins-e-raegan na bana

tujhe jo dard mila hai use fughan na bana

banana chahe to ab bijliyon se de tartib

chaman mein ab kabhi tinkon ka aashiyan na bana

kabhi wo faez-e-jalwa hai aur kabhi mahrum

mujhe KHud apne hi dil se tu bad-guman na bana

sabhi ko ho gaya ab tere 'ishq ka da'wa

kaha to tha ki mohabbat ko dastan na bana

halak-e-dard-e-mohabbat mujhi ko rahne de

nigah-e-naz ko ghaarat-gar-e-jahan na bana

raha 'azab mein dil ka mu'amla 'maikash'

rah-e-wafa mein koi bhi tu raaz-dan na bana