fareb-kar parinda tha par jo mar gaya

fareb-kār parinda thā par jo maar gayā

giraft chhūT ga.ī haath se shikār gayā

yahī nahīñ hai ki va.ade kā e.atibār gayā

ik aa.ina bhī to zad meñ pas-e-ġhubār gayā

maiñ qurbatoñ kī Dagar se kahāñ nahīñ pahuñchā

ḳhudī kī jhiil meñ utrā junūñ ke paar gayā

koī charāġh jalā kar hī raat ham kāTeñ

vo raushnī kā payambar thā din guzār gayā

maiñ tere dar se tahī-dast uTh nahīñ saktā

bas ik kulāh-e-anā thī use bhī haar gayā

yahāñ to ḳhud ko samajhnā muhāl hai 'shā.eq'

mirā shu.ūr ye āḳhir kahāñ utaar gayā

fareb-kar parinda tha par jo mar gaya

giraft chhuT gai hath se shikar gaya

yahi nahin hai ki wade ka eatibar gaya

ek aaina bhi to zad mein pas-e-ghubar gaya

main qurbaton ki Dagar se kahan nahin pahuncha

KHudi ki jhil mein utra junun ke par gaya

koi charagh jala kar hi raat hum kaTen

wo raushni ka payambar tha din guzar gaya

main tere dar se tahi-dast uTh nahin sakta

bas ek kulah-e-ana thi use bhi haar gaya

yahan to KHud ko samajhna muhaal hai 'shaeq'

mera shuur ye aaKHir kahan utar gaya