fareb-KHurda hain taham koi malal nahin

fareb-ḳhurda haiñ tāham koī malāl nahīñ

hamāre ishq kā maqsad tirā visāl nahīñ

maiñ laḌ rahā thā ba-hosh-o-havās dushman se

ik aa.ina thā mire rū-ba-rū ḳhayāl nahīñ

koī umiid kisī se na koī ḳhvāb-e-hasīñ

maiñ phir bhī zinda huuñ kyā ye mirā kamāl nahīñ

tamām umr ke lamhāt haiñ tar-o-tāza

mirī nigāh meñ haa.il ye māh-o-sāl nahīñ

har ek lamha hai akkās-e-rū-e-mustaqbil

dayār-e-shauq meñ maazī nahīñ hai haal nahīñ

shikast-e-azm-e-safar kā javāz mat DhūñDo

thakā huā huuñ maiñ be-shak magar niDhāl nahīñ

har ek lamha sañvartā hai ā.ina-ḳhāna

maiñ lā-javāb nahīñ tū bhī be-misāl nahīñ

ye daur sāhib-e-ehsās pe girāñ hai bahut

yahāñ pe kaun hai insāñ jo ḳhasta-hāl nahīñ

ye iqtizā-e-usūl-e-vafā hai ai 'shāriq'

bas un se ijz hī kiije koī savāl nahīñ

fareb-KHurda hain taham koi malal nahin

hamare ishq ka maqsad tera visal nahin

main laD raha tha ba-hosh-o-hawas dushman se

ek aaina tha mere ru-ba-ru KHayal nahin

koi umid kisi se na koi KHwab-e-hasin

main phir bhi zinda hun kya ye mera kamal nahin

tamam umr ke lamhat hain tar-o-taza

meri nigah mein hail ye mah-o-sal nahin

har ek lamha hai akkas-e-ru-e-mustaqbil

dayar-e-shauq mein mazi nahin hai haal nahin

shikast-e-azm-e-safar ka jawaz mat DhunDo

thaka hua hun main be-shak magar niDhaal nahin

har ek lamha sanwarta hai aaina-KHana

main la-jawab nahin tu bhi be-misal nahin

ye daur sahib-e-ehsas pe giran hai bahut

yahan pe kaun hai insan jo KHasta-haal nahin

ye iqtiza-e-usul-e-wafa hai ai 'shaariq'

bas un se ijz hi kije koi sawal nahin