farebi zist ke naKHre uTha kar

farebī ziist ke naḳhre uThā kar

thakan hone lagī ḳhud se nibhā kar

anā merī mujhe jhukne na degī

zamāna thak gayā hai aazmā kar

kisī bhī taur jo jiitā na jaa.e

use tum jiit lenā muskurā kar

hazāroñ ḳhvāb Thukrā.e haiñ maiñ ne

tumhāre hijr meñ nīñdeñ gañvā kar

zarā sī choT par rone se pahle

kabhī to dard duniyā ke ginā kar

ġhazab manzar thā pahle rūThnā phir

tumhārā ḳhuub hañsnā khilkhilā kar

kisī ko rāste chhalte rahe haiñ

kisī ko manzileñ lā.īñ bulā kar

kabhī imdād bhijvāne se pahle

hamāre āñsuoñ se mashvara kar

tire ehsān se dil bhar gayā hai

kahāñ rakh luuñ maiñ tere ġham chhupā kar

vo shā'ir the magar meDal unheñ bhī

mile haiñ raag darbārī sunā kar

ġhazal hogī ravānī meñ tabhī jab

likhoge dard merā gungunā kar

farebi zist ke naKHre uTha kar

thakan hone lagi KHud se nibha kar

ana meri mujhe jhukne na degi

zamana thak gaya hai aazma kar

kisi bhi taur jo jita na jae

use tum jit lena muskura kar

hazaron KHwab Thukrae hain main ne

tumhaare hijr mein ninden ganwa kar

zara si choT par rone se pahle

kabhi to dard duniya ke gina kar

ghazab manzar tha pahle ruThna phir

tumhaara KHub hansna khilkhila kar

kisi ko raste chhalte rahe hain

kisi ko manzilen lain bula kar

kabhi imdad bhijwane se pahle

hamare aansuon se mashwara kar

tere ehsan se dil bhar gaya hai

kahan rakh lun main tere gham chhupa kar

wo sha'ir the magar meDal unhen bhi

mile hain rag darbari suna kar

ghazal hogi rawani mein tabhi jab

likhoge dard mera gunguna kar