fariyaad kije kucha-e-dildar ki taraf

fariyād kiije kūcha-e-dildār kī taraf

bulbul pukārtī rahī gulzār kī taraf

farmā diye ki qatl kā kis ke hai aaj qasd

har dam nazar jo paḌtī hai talvār kī taraf

fānūs meñ charāġh ko aisā kahāñ faroġh

dekho to us ke burqā-o-ruḳhsār kī taraf

fattānī jis ne dekhī hai us chashm-e-shoḳh kī

dekhī kabhī na nargis-e-bīmār kī taraf

furqat meñ gul kī bulbul-e-shaidā chaman meñ aaj

hasrat se dekhtā hai bahut ḳhaar kī taraf

favvāre chhūTte haiñ mizha se sarishk ke

dekho to merī chashm-e-guhar-bār kī taraf

faaqa qubūl minnat-e-duniyā nahīñ qubūl

sag ho to mail ho use murdār kī taraf

fart-e-hujūm-e-ḳhalq se hoñ band rāste

vo rashk-e-yūsuf aa.e jo bāzār kī taraf

farhād kī vo tesha-zanī kā bañdhā ḳhayāl

sar maiñ ne phoḌā dekhiye kohsār kī taraf

fasl-e-bahār aa.ī hai sayyād chhoḌ de

yā le ke chal qafas hī ko gulzār kī taraf

fardā-e-roz-e-hashr se 'bāqī' maiñ kyoñ Darūñ

ġhaffār hogā mujh se gunahgār kī taraf

fariyaad kije kucha-e-dildar ki taraf

bulbul pukarti rahi gulzar ki taraf

farma diye ki qatl ka kis ke hai aaj qasd

har dam nazar jo paDti hai talwar ki taraf

fanus mein charagh ko aisa kahan farogh

dekho to us ke burqa-o-ruKHsar ki taraf

fattani jis ne dekhi hai us chashm-e-shoKH ki

dekhi kabhi na nargis-e-bimar ki taraf

furqat mein gul ki bulbul-e-shaida chaman mein aaj

hasrat se dekhta hai bahut KHar ki taraf

fawware chhuTte hain mizha se sarishk ke

dekho to meri chashm-e-guhar-bar ki taraf

faqa qubul minnat-e-duniya nahin qubul

sag ho to mail ho use murdar ki taraf

fart-e-hujum-e-KHalq se hon band raste

wo rashk-e-yusuf aae jo bazar ki taraf

farhad ki wo tesha-zani ka bandha KHayal

sar main ne phoDa dekhiye kohsar ki taraf

fasl-e-bahaar aai hai sayyaad chhoD de

ya le ke chal qafas hi ko gulzar ki taraf

farda-e-roz-e-hashr se 'baqi' main kyon Darun

ghaffar hoga mujh se gunahgar ki taraf