farogh-e-dida-wari ka zamana aaya hai

faroġh-e-dīda-varī kā zamāna aayā hai

diloñ kī be-ḳhabarī kā zamāna aayā hai

ḳhirad se kah do ki tanhā na kaT sakegī ye raah

junūñ kī ham-safarī kā zamāna aayā hai

pahnāo lāla-o-nasrīñ ko taaj kāñToñ kā

tilism-e-ḳhush-nazarī kā zamāna aayā hai

naved dī hai ye mahrūmī-e-mohabbat ne

duā kī be-asarī kā zamāna aayā hai

nikhār aane lagā phir ḳharāba-e-jāñ par

ye kis kī jalvagarī kā zamāna aayā hai

kaho sabā se ye vārafta-hāliyāñ chhoḌe

shu.ūr-e-nāma-barī kā zamāna aayā hai

kahāñ vo daur ki yak-gūna be-ḳhudī māñgeñ

surūr-e-ḳhud-nigarī kā zamāna aayā hai

bahār laa.ī hai ab ke payām aur hī kuchh

diloñ kī baḳhiyā-girī kā zamāna aayā hai

sukūt-e-nīm-shabī se guzar chalo 'hurmat'

ki nāla-e-saharī kā zamāna aayā hai

farogh-e-dida-wari ka zamana aaya hai

dilon ki be-KHabari ka zamana aaya hai

KHirad se kah do ki tanha na kaT sakegi ye rah

junun ki ham-safari ka zamana aaya hai

pahnao lala-o-nasrin ko taj kanTon ka

tilism-e-KHush-nazari ka zamana aaya hai

nawed di hai ye mahrumi-e-mohabbat ne

dua ki be-asari ka zamana aaya hai

nikhaar aane laga phir KHaraba-e-jaan par

ye kis ki jalwagari ka zamana aaya hai

kaho saba se ye warafta-haaliyan chhoDe

shuur-e-nama-bari ka zamana aaya hai

kahan wo daur ki yak-guna be-KHudi mangen

surur-e-KHud-nigari ka zamana aaya hai

bahaar lai hai ab ke payam aur hi kuchh

dilon ki baKHiya-giri ka zamana aaya hai

sukut-e-nim-shabi se guzar chalo 'hurmat'

ki nala-e-sahari ka zamana aaya hai