farogh-e-husn mein kya be-sabaat dil ka wajud

faroġh-e-husn meñ kyā be-sabāt dil kā vajūd

vo āftāb ye shabnam vo aag ye bārūd

zahe madārij-o-irfān-o-lutf-e-bazm-e-shuhūd

hamīñ haiñ abd hamīñ abadiyat hamīñ ma.abūd

vo baar baar mohabbat se zikr-e-ḳhair kareñ

shahīd-e-ġham kī yahī fātiha yahī hai darūd

savād-e-shām-e-mohabbat hai dūd-e-be-ātish

tulū-e-sub.h-e-tamannā hai ātish-e-be-dūd

ba-lutf-o-aish-o-nishāt-e-jahāñ mashū nāzāñ

darīñ sarā-e-adam āshnā che-hast va che-būd

nigāh-e-nāz ke jauhar ye paa.e kyā mumkin

fuġhāñ bhī teġh hai lekin hai teġh-e-zañg-ālūd

uThī ghaTā kī tarah chhā ga.ī fazā kī tarah

hudūd-e-husn meñ tāsīr-e-ishq-e-nā-mahdūd

ḳhudā ke jalva-e-qudrat kā pūchhnā kyā hai

jidhar jidhar nazar uTThī udhar udhar maujūd

tarīq-e-ishq meñ kyuuñ bār-e-ġham uThā.e na dil

isī pahāḌ ke nīche hai manzil-e-maqsūd

tule haiñ phir mah-o-anjum mujhe satāne par

dil-e-hazīñ vahī ik nāla-e-falak-paimūd

ġhazab huā ki muqaddar mujhe vahāñ laayā

jahāñ sukūn bhī nāpaid lutf bhī mafqūd

rahā ye apnī hayāt-o-mamāt kā aalam

kabhī vajūd adam thā kabhī adam thā vajūd

nigāh-e-nāz meñ dil kā kuchh eqtidār nahīñ

agar abhī hai ye maqbūl to abhī mardūd

havās-o-hosh farishtoñ ke jis se rah na sakeñ

fazā meñ guuñj rahā hai vo naġhma-e-dā.ūd

baḌhā.e vādī-e-hasrat meñ kyā qadam koī

ki ḳhizr-e-rāh bhī gum aur raah bhī masdūd

faroġh-e-husn taġhayyur-pasand kuchh bhī nahīñ

ziyā-e-kirmak-e-shab-tāb kī hai koī numūd

yahāñ adā-e-farā.ez kī sūrateñ haiñ judā

namāz-e-ishq meñ vājib nahīñ rukū-o-sujūd

payām-e-marg bhī pahuñchā naved-e-zīst ke saath

jo ittifāq se amrit milā to zahr-ālūd

vafā-o-ishq kī dushvāriyāñ ḳhudā kī panāh

ajab ajab haiñ sharā.it ajab ajab haiñ quyūd

tasarrufāt-e-mohabbat ke sab karishme haiñ

nahīñ to kyuuñ ho tasadduq ayaaz par mahmūd

adam se aa.e the ham aur phir adam ko ga.e

ye hai haqīqat-e-qabl-az-vajūd-o-ba.ad-e-vajūd

tirā qalaq bhī tirā dard bhī tirā ġham bhī

hamāre ishq ke itne gavāh haiñ maujūd

ḳhudā kare ki na da.avā kareñ ḳhudā.ī kā

sunā to hogā butoñ ne natīja-e-namrūd

bashar ko quvvat-e-ehsās ne ḳharāb kiyā

jo ye na ho to jahāñ meñ na phir ziyāñ hai na suud

rah-e-talab meñ qadam Dagmagā.e jaate haiñ

sambhāl yā mire allāh yā mire ma.abūd

nigāh kard zi-qahr-o-itāb fitna-gare

ba-īñ tavaqquf-e-andak havās-o-hosh-e-rabūd

jamāl-e-shāhid-e-mutlaq se jis ko matlab hai

vo dil sa.iid nazar as.ad aarzū mas.ūd

janāb-e-'nūh' ko tūfān-e-ġham se ḳhauf nahīñ

ki iḳhtiyār meñ un ke hai kashtī-e-maqsūd

farogh-e-husn mein kya be-sabaat dil ka wajud

wo aaftab ye shabnam wo aag ye barud

zahe madarij-o-irfan-o-lutf-e-bazm-e-shuhud

hamin hain abd hamin abadiyat hamin mabud

wo bar bar mohabbat se zikr-e-KHair karen

shahid-e-gham ki yahi fatiha yahi hai darud

sawad-e-sham-e-mohabbat hai dud-e-be-atish

tulu-e-subh-e-tamanna hai aatish-e-be-dud

ba-lutf-o-aish-o-nishat-e-jahan mashu nazan

darin sara-e-adam aashna che-hast wa che-bud

nigah-e-naz ke jauhar ye pae kya mumkin

fughan bhi tegh hai lekin hai tegh-e-zang-alud

uThi ghaTa ki tarah chha gai faza ki tarah

hudud-e-husn mein tasir-e-ishq-e-na-mahdud

KHuda ke jalwa-e-qudrat ka puchhna kya hai

jidhar jidhar nazar uTThi udhar udhar maujud

tariq-e-ishq mein kyun bar-e-gham uThae na dil

isi pahaD ke niche hai manzil-e-maqsud

tule hain phir mah-o-anjum mujhe satane par

dil-e-hazin wahi ek nala-e-falak-paimud

ghazab hua ki muqaddar mujhe wahan laya

jahan sukun bhi napaid lutf bhi mafqud

raha ye apni hayat-o-mamat ka aalam

kabhi wajud adam tha kabhi adam tha wajud

nigah-e-naz mein dil ka kuchh eqtidar nahin

agar abhi hai ye maqbul to abhi mardud

hawas-o-hosh farishton ke jis se rah na saken

faza mein gunj raha hai wo naghma-e-daud

baDhae wadi-e-hasrat mein kya qadam koi

ki KHizr-e-rah bhi gum aur rah bhi masdud

farogh-e-husn taghayyur-pasand kuchh bhi nahin

ziya-e-kirmak-e-shab-tab ki hai koi numud

yahan ada-e-faraez ki suraten hain juda

namaz-e-ishq mein wajib nahin ruku-o-sujud

payam-e-marg bhi pahuncha nawed-e-zist ke sath

jo ittifaq se amrit mila to zahr-alud

wafa-o-ishq ki dushwariyan KHuda ki panah

ajab ajab hain sharait ajab ajab hain quyud

tasarrufat-e-mohabbat ke sab karishme hain

nahin to kyun ho tasadduq ayaz par mahmud

adam se aae the hum aur phir adam ko gae

ye hai haqiqat-e-qabl-az-wajud-o-baad-e-wajud

tera qalaq bhi tera dard bhi tera gham bhi

hamare ishq ke itne gawah hain maujud

KHuda kare ki na dawa karen KHudai ka

suna to hoga buton ne natija-e-namrud

bashar ko quwwat-e-ehsas ne KHarab kiya

jo ye na ho to jahan mein na phir ziyan hai na sud

rah-e-talab mein qadam Dagmagae jate hain

sambhaal ya mere allah ya mere mabud

nigah kard zi-qahr-o-itab fitna-gare

ba-in tawaqquf-e-andak hawas-o-hosh-e-rabud

jamal-e-shahid-e-mutlaq se jis ko matlab hai

wo dil said nazar asad aarzu masud

janab-e-'nuh' ko tufan-e-gham se KHauf nahin

ki iKHtiyar mein un ke hai kashti-e-maqsud