farsh-e-zamin pe barg-e-KHizani ka rang hai

farsh-e-zamīñ pe barg-e-ḳhizānī kā rañg hai

dīvār-o-dar pe naql-e-makānī kā rañg hai

āñkhoñ meñ tairte haiñ safīne vidā.a ke

lahje meñ āb-jū kī ravānī kā rañg hai

ifrāt-e-chashm-o-lab kī kahīñ sīḌhiyoñ meñ thī

lekin chhatoñ pe qaht-o-girānī kā rañg hai

gāloñ pe ik lakīr sī sailāb-e-ashk se

dīvār par kahīñ kahīñ paanī kā rañg hai

surḳhī ke saath aam sā be-sharh vāqi.a

tasvīr meñ ajiib ma.ānī kā rañg hai

qāsid ke donoñ haath khule lab ḳhamosh haiñ

kuchh aañkh meñ payām-e-zabānī kā rañg hai

logoñ ne shauq-e-sabz meñ pakne na dī ye fasl

har-chand surḳh ahd-e-javānī kā rañg hai

farsh-e-zamin pe barg-e-KHizani ka rang hai

diwar-o-dar pe naql-e-makani ka rang hai

aankhon mein tairte hain safine widaa ke

lahje mein aab-ju ki rawani ka rang hai

ifraat-e-chashm-o-lab ki kahin siDhiyon mein thi

lekin chhaton pe qaht-o-girani ka rang hai

galon pe ek lakir si sailab-e-ashk se

diwar par kahin kahin pani ka rang hai

surKHi ke sath aam sa be-sharh waqia

taswir mein ajib maani ka rang hai

qasid ke donon hath khule lab KHamosh hain

kuchh aankh mein payam-e-zabani ka rang hai

logon ne shauq-e-sabz mein pakne na di ye fasl

har-chand surKH ahd-e-jawani ka rang hai