fart-e-shauq us but ke kuche mein laga le jaega

fart-e-shauq us but ke kūche meñ lagā le jā.egā

kāba-e-maqsūd tak mujh ko ḳhudā le jā.egā

kaaT kar par bhī mujhe sayyād be-qābū na chhoḌ

nā-tavāñ huuñ baad kā jhokā uḌā le jā.egā

rote rote jaan jāvegī firāq-e-yār meñ

ashk kā dariyā mirā murda bahā le jā.egā

dil mirā muTThī meñ rakhte ho tumhāre haath se

chhīn kar ik din use duzd-e-hinā le jā.egā

misr tak pahuñche na jo kan.āñ se vo yūsuf huuñ maiñ

dast-e-iḳhvāñ se chhuTā to bheḌiyā le jā.egā

ek gul us baaġh kā bū-e-vafā rakhtā nahīñ

sabza-e-begāna shauq-e-āshnā le jā.egā

va.ada-e-sādiq to izrā.īl se hai dekhiye

is sire se mujh ko kab tak us sirā le jā.egā

bāġhbāñ gulshan ke darvāze ko kyā rakhtā hai band

kaun ġhunche kī kulah gul kī qabā le jā.egā

ustuḳhvāñ ujrat meñ deñge ham faqīr ai shāh-e-husn

arzī apne shauq kī tujh tak humā le jā.egā

kashtī-e-tan bahr-e-hastī meñ rahī barsoñ tabāh

paar ise ik dam meñ is kā nāḳhudā le jā.egā

husn dikhlā degā ai but tujh meñ shaan allāh kī

tere aage aalam apnī iltijā jā.egā

bose legā dast-e-teġh-e-qātil-e-bebāk ke

'ātish'-e-maqtūl apnā ḳhūñ-bahā le jā.egā

fart-e-shauq us but ke kuche mein laga le jaega

kaba-e-maqsud tak mujh ko KHuda le jaega

kaT kar par bhi mujhe sayyaad be-qabu na chhoD

na-tawan hun baad ka jhoka uDa le jaega

rote rote jaan jawegi firaq-e-yar mein

ashk ka dariya mera murda baha le jaega

dil mera muTThi mein rakhte ho tumhaare hath se

chhin kar ek din use duzd-e-hina le jaega

misr tak pahunche na jo kanan se wo yusuf hun main

dast-e-iKHwan se chhuTa to bheDiya le jaega

ek gul us bagh ka bu-e-wafa rakhta nahin

sabza-e-begana shauq-e-ashna le jaega

wada-e-sadiq to izrail se hai dekhiye

is sire se mujh ko kab tak us sira le jaega

baghban gulshan ke darwaze ko kya rakhta hai band

kaun ghunche ki kulah gul ki qaba le jaega

ustuKHwan ujrat mein denge hum faqir ai shah-e-husn

arzi apne shauq ki tujh tak huma le jaega

kashti-e-tan bahr-e-hasti mein rahi barson tabah

par ise ek dam mein is ka naKHuda le jaega

husn dikhla dega ai but tujh mein shan allah ki

tere aage aalam apni iltija jaega

bose lega dast-e-tegh-e-qatil-e-bebak ke

'atish'-e-maqtul apna KHun-baha le jaega