fasana-e-dard-e-ishq unwan badal badal kar suna raha hun

fasāna-e-dard-e-ishq unvāñ badal badal kar sunā rahā huuñ

jigar jigar meñ utar rahā huuñ nazar nazar meñ samā rahā huuñ

harīm-e-nāz-o-niyāz meñ kyaa, maze mohabbat ke pā rahā huuñ

fasāna-e-aish sun rahā huuñ fasāna-e-ġham sunā rahā huuñ

tumhārī mashq-e-jafā ke sadqe buland haiñ dil ke hausle bhī

jahāñ jahāñ choT paḌ rahī hai vahāñ vahāñ muskurā rahā huuñ

sirāt-e-husn-e-talab meñ mujh ko añdherī rātoñ kā ġham nahīñ hai

tirī mohabbat kī raushnī meñ qadam maiñ apnā baḌhā rahā huuñ

yaqīn maano ki bijliyāñ bhī falak se aa kar panāh leñgī

chaman meñ sulh-o-safā ke tinkoñ se āshiyāna banā rahā huuñ

falak ke dāman pe chāñd taare nahīñ daraḳhshāñ to kyā 'nujūmī'

hazāroñ armāñ kā ḳhuun de kar maiñ shab ko rañgīñ banā rahā huuñ

fasana-e-dard-e-ishq unwan badal badal kar suna raha hun

jigar jigar mein utar raha hun nazar nazar mein sama raha hun

harim-e-naz-o-niyaz mein kya, maze mohabbat ke pa raha hun

fasana-e-aish sun raha hun fasana-e-gham suna raha hun

tumhaari mashq-e-jafa ke sadqe buland hain dil ke hausle bhi

jahan jahan choT paD rahi hai wahan wahan muskura raha hun

siraat-e-husn-e-talab mein mujh ko andheri raaton ka gham nahin hai

teri mohabbat ki raushni mein qadam main apna baDha raha hun

yaqin mano ki bijliyan bhi falak se aa kar panah lengi

chaman mein sulh-o-safa ke tinkon se aashiyana bana raha hun

falak ke daman pe chand tare nahin daraKHshan to kya 'nujumi'

hazaron arman ka KHun de kar main shab ko rangin bana raha hun