fasana-ha-e-shab-e-gham hai dastan meri

fasāna-hā-e-shab-e-ġham hai dāstāñ merī

ga.ī na aah kabhī sū-e-āsmāñ merī

likhā huā thā muqaddar meñ jīte-jī marnā

chhupī huī thī kahīñ marg-e-nā-gahāñ merī

jahāñ pe ḳhūn-e-shahīdāñ thā qarz miTTī par

usī dayār meñ hai gor-e-be-nishāñ merī

charāġh-e-shab kī tarah soz-e-ġham ke mahshar meñ

na-jāne kaise ga.ī umr rā.egāñ merī

mizāj-e-husn hai 'barham' nigār-ḳhāne meñ

huī hai tarz-e-takallum bhī be-zabāñ merī

talāsh-e-yār meñ dīda-o-dil bhī ibrat haiñ

luTā ga.e haiñ kahīñ par matā-e-jāñ merī

vo shoḳh-e-nāz gulāboñ se khelne vaale

hañsī hañsī meñ uḌā le ga.e fuġhāñ merī

sabā ne chheḌ diye sāz-e-dil mohabbat ke

kalī kalī ke laboñ par hai dāstāñ merī

churā ke le ga.ī saare hī raaz gulshan ke

vahī sabā thī muqaddar meñ rāz-dāñ merī

ulajh paḌā hai vo qātil bhī be-sabab ham se

ḳhudā bachā.e kahīñ le na le vo jaañ merī

koī nahīñ hai jo is zindagī kā mehvar ho

bhaTak rahī hai azal se kahāñ kahāñ merī

uThā janāza to kohrām mach gayā 'barham'

sañbhal ke le ga.e miTTī sī mehrbāñ merī

fasana-ha-e-shab-e-gham hai dastan meri

gai na aah kabhi su-e-asman meri

likha hua tha muqaddar mein jite-ji marna

chhupi hui thi kahin marg-e-na-gahan meri

jahan pe KHun-e-shahidan tha qarz miTTi par

usi dayar mein hai gor-e-be-nishan meri

charagh-e-shab ki tarah soz-e-gham ke mahshar mein

na-jaane kaise gai umr raegan meri

mizaj-e-husn hai 'barham' nigar-KHane mein

hui hai tarz-e-takallum bhi be-zaban meri

talash-e-yar mein dida-o-dil bhi ibrat hain

luTa gae hain kahin par mata-e-jaan meri

wo shoKH-e-naz gulabon se khelne wale

hansi hansi mein uDa le gae fughan meri

saba ne chheD diye saz-e-dil mohabbat ke

kali kali ke labon par hai dastan meri

chura ke le gai sare hi raaz gulshan ke

wahi saba thi muqaddar mein raaz-dan meri

ulajh paDa hai wo qatil bhi be-sabab hum se

KHuda bachae kahin le na le wo jaan meri

koi nahin hai jo is zindagi ka mehwar ho

bhaTak rahi hai azal se kahan kahan meri

uTha janaza to kohram mach gaya 'barham'

sanbhal ke le gae miTTi si mehrban meri