fasana ishq ka wo is tarah dohrae jate hain

fasāna ishq kā vo is tarah dohrā.e jaate haiñ

zabāñ ḳhāmosh hai nazroñ se kuchh samjhā.e jaate haiñ

kisī ne be-ruḳhī samjhā koī lutf-o-karam samjhā

kuchh is andāz se mahfil meñ vo sharmā.e jaate haiñ

kahīñ aisā na ho yā-rab mirī tauba pe ban aa.e

ye bādal aaj ghir ghir kar mujhe bahkā.e jaate haiñ

mujhe ab dil kī dhaḌkan se yahī mahsūs hotā hai

tamannāoñ kī duniyā meñ vo jaise aa.e jaate haiñ

qafas achchhā hai aise āshiyāñ se ai chaman vaalo

jahāñ zulm-o-sitam har vaqt ham par Dhaa.e jaate haiñ

qadam chūmegī un ke kāmyābī ek din baḌh kar

safīna apnā jo tūfān se Takrā.e jaate haiñ

vufūr-e-shauq meñ ai 'dard' merā ab ye aalam hai

jidhar nazreñ uThātā huuñ vahīñ vo paa.e jaate haiñ

fasana ishq ka wo is tarah dohrae jate hain

zaban KHamosh hai nazron se kuchh samjhae jate hain

kisi ne be-ruKHi samjha koi lutf-o-karam samjha

kuchh is andaz se mahfil mein wo sharmae jate hain

kahin aisa na ho ya-rab meri tauba pe ban aae

ye baadal aaj ghir ghir kar mujhe bahkae jate hain

mujhe ab dil ki dhaDkan se yahi mahsus hota hai

tamannaon ki duniya mein wo jaise aae jate hain

qafas achchha hai aise aashiyan se ai chaman walo

jahan zulm-o-sitam har waqt hum par Dhae jate hain

qadam chumegi un ke kaamyabi ek din baDh kar

safina apna jo tufan se Takrae jate hain

wufur-e-shauq mein ai 'dard' mera ab ye aalam hai

jidhar nazren uThata hun wahin wo pae jate hain