fasana jaur-e-behad ka kabhi dohra nahin sakta

fasāna jaur-e-behad kā kabhī dohrā nahīñ saktā

karam harf-e-shikāyat ban ke lab par aa nahīñ saktā

mire soz-e-nihāñ kā raaz koī pā nahīñ saktā

jo dil mahsūs kartā hai zabāñ par aa nahīñ saktā

agar chāhūñ to jal jaa.e ishāre meñ naqāb un kā

magar maiñ ātish-e-dīdār ko bhaḌkā nahīñ saktā

mirī fariyād kī har lai ba-unvān-e-tarannum hai

na samjhe koī maiñ ishrat kā naġhma gā nahīñ saktā

agar hai shauq-e-nazzāra mazāq-e-dīd paidā kar

baġhair-e-shauq-e-behad vo nazar meñ aa nahīñ saktā

samajh leñ bahr-e-tūfāñ-ḳhez kī nā-āshnā maujeñ

dil-e-sāhil-talab ko ab Duboyā jā nahīñ saktā

hañse koī koī ro.e ye apnī apnī fitrat hai

magar 'māhir' kā dil ġham se kabhī ghabrā nahīñ saktā

fasana jaur-e-behad ka kabhi dohra nahin sakta

karam harf-e-shikayat ban ke lab par aa nahin sakta

mere soz-e-nihan ka raaz koi pa nahin sakta

jo dil mahsus karta hai zaban par aa nahin sakta

agar chahun to jal jae ishaare mein naqab un ka

magar main aatish-e-didar ko bhaDka nahin sakta

meri fariyaad ki har lai ba-unwan-e-tarannum hai

na samjhe koi main ishrat ka naghma ga nahin sakta

agar hai shauq-e-nazzara mazaq-e-did paida kar

baghair-e-shauq-e-behad wo nazar mein aa nahin sakta

samajh len bahr-e-tufan-KHez ki na-ashna maujen

dil-e-sahil-talab ko ab Duboya ja nahin sakta

hanse koi koi roe ye apni apni fitrat hai

magar 'mahir' ka dil gham se kabhi ghabra nahin sakta