fasil-e-zat-giri qaid se riha hue hum

fasīl-e-zāt-girī qaid se rihā hue ham

ḳhayāl-e-ġhair kī vus.at se āshnā hue ham

hisār-e-lafz meñ aatā na thā malāl-e-darūñ

zabān-e-hāl se āḳhir kahīñ adā hue ham

nazar kareñ vo jo dil par to haiñ vahī ke vahī

kabhī jo aa.ina dekheñ to kyā se kyā hue ham

chaman meñ khīñch ke laa.ī thī justujū jin kī

vo nik.hateñ nahīñ baaqī to lo havā hue ham

ye kis kā zahr-e-judā.ī lahū meñ tairtā hai

hameñ to kuchh bhī nahīñ yaad kab judā hue ham

nihāñ thī sañg meñ ātish ki jal ke ḳhaak hue

na ibtidā bhī huī thī ki intihā hue ham

kahāñ se lā.iye ḳhud ko ki ḳhud ko dekh sakeñ

jab apne-āp se guzre to rūnumā hue ham

fasil-e-zat-giri qaid se riha hue hum

KHayal-e-ghair ki wusat se aashna hue hum

hisar-e-lafz mein aata na tha malal-e-darun

zaban-e-haal se aaKHir kahin ada hue hum

nazar karen wo jo dil par to hain wahi ke wahi

kabhi jo aaina dekhen to kya se kya hue hum

chaman mein khinch ke lai thi justuju jin ki

wo nikhaten nahin baqi to lo hawa hue hum

ye kis ka zahr-e-judai lahu mein tairta hai

hamein to kuchh bhi nahin yaad kab juda hue hum

nihan thi sang mein aatish ki jal ke KHak hue

na ibtida bhi hui thi ki intiha hue hum

kahan se laiye KHud ko ki KHud ko dekh saken

jab apne-ap se guzre to runuma hue hum