fasl aai gham ki jadu shauq ke chalne lage

fasl aa.ī ġham kī jaadū shauq ke chalne lage

bāġh-e-vahshat ke shajar phir phūlne phalne lage

zindagī merī badal dī barhamī-e-nāz ne

dard ke sāñche meñ lamhāt-e-tarab Dhalne lage

dilbarī ko phir vafā kā imtihāñ manzūr hai

sāya-e-mizhgāñ meñ un ke fitne phir palne lage

fasl-e-gul tū hī batā ye daur kaisā aa gayā

ab to aa.e din chaman meñ āshiyāñ jalne lage

rāz-e-hastī kholtī hai jaise fitrat kī zabāñ

dāstāñ tāroñ kī suniye raat jab Dhalne lage

is se baḌh kar aur kyā mujh ko miTā.eñge ki vo

ḳhud kaf-e-afsos mere haal par malne lage

muskurāyā hai tasavvur meñ ye 'ishrat' kaun aaj

har taraf bazm-e-tamannā meñ diye jalne lage

fasl aai gham ki jadu shauq ke chalne lage

bagh-e-wahshat ke shajar phir phulne phalne lage

zindagi meri badal di barhami-e-naz ne

dard ke sanche mein lamhat-e-tarab Dhalne lage

dilbari ko phir wafa ka imtihan manzur hai

saya-e-mizhgan mein un ke fitne phir palne lage

fasl-e-gul tu hi bata ye daur kaisa aa gaya

ab to aae din chaman mein aashiyan jalne lage

raaz-e-hasti kholti hai jaise fitrat ki zaban

dastan taron ki suniye raat jab Dhalne lage

is se baDh kar aur kya mujh ko miTaenge ki wo

KHud kaf-e-afsos mere haal par malne lage

muskuraya hai tasawwur mein ye 'ishrat' kaun aaj

har taraf bazm-e-tamanna mein diye jalne lage