fasl-e-gul aai ajab rang hai maiKHane ka

fasl-e-gul aa.ī ajab rang hai maiḳhāne kā

husn dekhe koī ab shīshe kā paimāne kā

nāseho farz adā ho chukā samjhāne kā

chheḌnā Thiik nahīñ har ghaḌī dīvāne kā

kaun uftāda paḌī ai dil-e-betāb na.ī

kuchh to ma.alūm ho baa.is tire ghabrāne kā

justujū ne tirī ik jā kahīñ rahne na diyā

mujh ko ka.abe hī kā rakkhā na sanam-ḳhāne kā

ḳhāna-e-dil ko ġham-e-yār ne ābād kiyā

kaun pursāñ thā is ujḌe hue kāshāne kā

dil ko ho jaatā hai bāvar ki vo sach kahte haiñ

aisā andāz hai kuchh un ke qasam khāne kā

chupke pī lete haiñ inkār nahīñ karte haiñ

shaiḳh jī suniye adab hai yahī maiḳhāne kā

kyā mazedār thī ulfat kī kahānī merī

sunñe vaalā na milā koī is afsāne kā

manzil-e-ishq ye hai ḳhuub samajh le ai dil

aasrā hai yahāñ apne kā na begāne kā

fikr lāhaq hai dam-e-marg ye vahshī ko tire

jā-nashīñ kis ko kiyā jā.egā vīrāne kā

tāzgī ruuh meñ chehre pe bashāshat aa.ī

vaah kyā kahnā chhalakte hue paimāne kā

roz raushan huā duniyā meñ ujālā phailā

rang badlā na magar mere siyah-ḳhāne kā

laag kī aag hī kambaḳht burī hotī hai

ek anjām huā sham.a kā parvāne kā

josh vo bāda-e-gulgūñ kā vo qulqul kī sadā

lab tak aanā vo chhalakte hue paimāne kā

un kī tasvīr-e-junūñ-ḳhez kā kuchh zikr nahīñ

naam badnām zamāne meñ hai dīvāne kā

sub.h tak jal chuke jāñbāz-e-mohabbat donoñ

sham.a ko ro.eñ ki mātam kareñ parvāne kā

umr itnī to kaTī bāda-kashī meñ 'ishrat'

ab kahāñ jā.eñge dar chhoḌ ke maiḳhāne kā

fasl-e-gul aai ajab rang hai maiKHane ka

husn dekhe koi ab shishe ka paimane ka

naseho farz ada ho chuka samjhane ka

chheDna Thik nahin har ghaDi diwane ka

kaun uftada paDi ai dil-e-betab nai

kuchh to malum ho bais tere ghabrane ka

justuju ne teri ek ja kahin rahne na diya

mujh ko kabe hi ka rakkha na sanam-KHane ka

KHana-e-dil ko gham-e-yar ne aabaad kiya

kaun pursan tha is ujDe hue kashane ka

dil ko ho jata hai bawar ki wo sach kahte hain

aisa andaz hai kuchh un ke qasam khane ka

chupke pi lete hain inkar nahin karte hain

shaiKH ji suniye adab hai yahi maiKHane ka

kya mazedar thi ulfat ki kahani meri

sunne wala na mila koi is afsane ka

manzil-e-ishq ye hai KHub samajh le ai dil

aasra hai yahan apne ka na begane ka

fikr lahaq hai dam-e-marg ye wahshi ko tere

ja-nashin kis ko kiya jaega virane ka

tazgi ruh mein chehre pe bashashat aai

wah kya kahna chhalakte hue paimane ka

roz raushan hua duniya mein ujala phaila

rang badla na magar mere siyah-KHane ka

lag ki aag hi kambaKHt buri hoti hai

ek anjam hua shama ka parwane ka

josh wo baada-e-gulgun ka wo qulqul ki sada

lab tak aana wo chhalakte hue paimane ka

un ki taswir-e-junun-KHez ka kuchh zikr nahin

nam badnam zamane mein hai diwane ka

subh tak jal chuke jaanbaz-e-mohabbat donon

shama ko roen ki matam karen parwane ka

umr itni to kaTi baada-kashi mein 'ishrat'

ab kahan jaenge dar chhoD ke maiKHane ka